Shillong, Jymmang 22: Ka tnad Forest ka Jylla, hynne ka step kala leit ban Jynrat ia kumba 50 tylli ki dukan ba shna beain harud ka surok Hynniew Mer.
Ka Tnad Forest bala synran da ki Magistrate bad Pulit, kila hiar ryngkat ki JCB ban jynrat naphang ia ki dukan ba dang shna, kiba la kynnoh shna beain, ha katei ka jaka kaba don majan ka lad ban leit sha Elephants fall.
Haba ioh ban iakren bad iwei I longkmie iba dei na Rangshen iba shong dukan mynta la 8 bnai eiei, I la ong ba im shym la ioh ia kano kano ka shithi na ka tnad pulit shuwa ban kyndang noh ia ki dukan, hynrei na ki 50 tylli ki dukan, tang 8 tylli kiba ioh jingtip, bad ha kane ka jingleit ban kyndang kane ka JCB, ki nongshong dukan ki la ialeh ban pynsangeh, hynrei kim shym la lah satia.
Ki longkmie ki la pynpaw ia ka jingbitar ia ka tnad pulit kaba la kyndang naphang ia ki dukan bad ki la pynrem ruh ia u Rapsang uba la kynnoh ba u dei u trai jong kane ka jaka, ha kaba u la ai jingbit ia ki ban tei ia kine ki dukan da kaba ong ba un iarap ia ki.
Ki katto katne ngut ki longkmie ki la pynpaw ba ka sorkar kadei ban siew ia ka bai lutksan sha ki namar ka tnad forest kadei ban kyndang tang ia kine ki 8 tylli ki dukan kiba la paw kyrteng, hynrei phewse ka jynrat lut ia baroh ki dukan kiba shna harud jong kane ka surok.
