Dibrugarh, Naitung 12 : Ka jingjynrat naduh tynrai ia u statue jong u Mahatma Gandhi khnang ban lah tei ia ka Tower Baje ha sor Doomdooma, Tinsukia, kala pynthnem ia ka jingiatai hapoh ka party ba synshar ia ka Jylla.
Une u statue ba 5.5 phut jong u Kpa ka Ri, uba don ha Gandhi Chowk ha sor Doomdoima la bun snem, ula shah weng ha ka sngi Balang da kaba pyndonkam ia ka puh shilum.
Kane ka jingjynrat ia une u statue kala pynbitar lep ia ki nongshongshnong, kiba la pyrshah jur bha ia ka rai ba la shim da ka Sorkar Jylla.
U MLA barim ka Doomdooma, Durga Bhumij, ula pyrshah jur ia kane ka kam bad pynpaw ia ka jingsngewsih halor ka rai bad ka kam jong ki bor District.
“U Statue jong u Mahatma Gandhi u dei ban don beit ha ka jaka bala pynieng ia u. Ngim lah ban shah ia ka Tower Baje ban tei ha kane ka jaka” ong u Bhumij.
Namar ka jingpyrshah kaba jur jong u paidbah, u MLA ka BJP na Doomdooma u Rupesh Gowala ha ka sngi Palei, ula kular ia ki paidah ba ia u statue ba thymmai jong u Mahatma Gandhi un sa pynieng biang ha kajuh ka jaka hapoh ka 6 bnai.
Haba thoh ha X, u Myntri Rangbah ka Assam Himanta Biswa Sarma ula ong “Ngam don jingtip halor ka rai bala shim da ki bor District. Ai ba ngan pynthikna ia ka jingshisha. Ka Assam kam lah siew kylliang ia u Mahatma Gandhi. Ula ieng skhem triang bad u Bharay Ratna Gopinath Bordoloi ha ka por ba ka Congress ba ialam da u Nehru ka kwah ban kynthup ia ka Assam ha Pakistan kat kum ka Grouping Plan”.
