Shillong, Nailar 12 : U MLA ka Mawkynrew Bah Banteidor Lyngdoh, ha ka sngi Nyngkong, ula hiar jurip ia ki artylli ki project surok bala pyntrei lyngba ka skhim Prime Minister’s Gram Sadak Yojana (PMGSY) –III ba jan kot T.25 klur ha ka thain Mawkynrew.
Kine ki surok ki kynthup ia ka surok na Mawkynrew sha Pingwait ha ka lynter ba 5.60 KM bala mang haduh T.7.20 klur bad ka surok na Mawkynrew sha Nohron ha ka lynter ba 19 KM, bala mang haduh T.17.82 klur. Kine ki project kila iaid shakhmat ha ka jingpyntrei.
Ia u MLA la synran da ki Ophisar ka Tnad PWD, ki Nongialam Shnong bad ki riew rangbah ka thain.
U MLA u la pynpaw ka jingsngew kmen ban iohi ba kine ki ar tylli ki projek surok ki la iaid shakhmat ban pynurlong ia ka jingangnud ba la slem ki nongshong ka thaiñ.
Ha shwa ka jingjurip ia kitei ki projek surok, u Bah Banteidor ha kaba sdang jong katei ka sngi, u la leit ban jngoh shwa ia ka jingshna Ïing Dorbar ka Shnong Thangsning.
Ia kane ka Iing Dorbar la mang tyngka 10 lak na ka Special Rural Work Programme (SRWP) bad khmih lynti ba shen yn pyndep noh ia ka.
Nangne u MLA u la pynlong ka jingjurip ia ka Holy Cross Higher Secondary School ha Mawkynrew ha kaba na ka skhim SRWP u la noh synñiang ban shna pynbha bad pynheh ia ka nalor ki jingker ha katei skul.
U la leit jurip ruh ia ka St. Joseph’s Health Centre, Mawkynrew ha kaba la ïakren ban pynbiang ia ka surok bad kiwei pat ki jingdonkam.
Hadien kane, u MLA u la leit ban jurip sa ia ka Jatah Primary Health Center (PHC) ha kaba la pynlong ruh da ka jingialang pyrkhat bad ki Doctor ka PHC ha ka jingiadonlang ki nongialam ka Synjuk Ki Dorbar Khadphra Shnong.
Hangne u Dr J Slong, Medical Officer Incharge ka PHC u la pynsngew ia ki jingdonkam ba kyrkieh ka PHC kata ia ka um bam, ki tiar jingsumar, ka bor ding elektrik, ka jingker nalor kiwei de.
Na ka liang u bah Pynskhem Mukhim, Chairman ka Synjuk u la aiti ruh da ka dorkhas ban dawa buh noh da ka Higher Secondary School ha katei ka thaiñ khnang ba kan iarap shibun ia ki nongshong shnong.
Haba ai jingkren u bah Banteidor u la kubur ban shimkhia ia ki jingtyrwa jong ki bad kyrpad ba kin don ia ka jingiaishah ba un lah ban pynurlong lut ia ki jingdawa jong ki.
Halor ka skul ba la buh jingtyrwa ban buh ia ka Higher Secondary School, u Bah Banteidor u la ong ba un ïakren bad ki bor pynïaid ka tnad pule bad ka jingtyrwa kaba shongnia ban suk ki khynnah pule namar ka thain ka la kham jngai na Shillong.
Photo Caption: Shi bynta ka jingpyntrei ïa ka surok ha Mawkynrew & u MLA, ki ophisar bad riewrangbah kiba dang pynlong jingjurip.
 –III ba jan kot T.25 klur ha ka thain Mawkynrew.){kind=link}