Shillong, Naiwieng 21 : U Symbud Myntri Rangbah ba khmih ia ka Tnad Pynroi Sor Bah Sniawbhalang Dhar ha ka sngi Thohdieng, ula leit jurip ia lai tylli ki project kiba heh ha Jowai, kiba pynpaw ia ka jingshimkhia jong ka Sorkar MDA ban pyntreikam sted ia ki jingtei.
Ia u DyCM la synran da u Myntri ka Koit ka Khiah bad MLA ka Jowai Bah Wailadmiki Shylla. U Bah Sniawbha ula shong bishar kam halor ka jingiaid ka jingtei ia ka Iew Iawmusiang, ka Working Women Hostel bad ka Mini Secretariat Complex.
Ka Iew Iawmusiang bala tei ha ka jingmang tyngka ba T.25.6 klur, kala shu sahteng da ki snem hynrei mynta ki jingtei kila dep kumba 78% bad la khmih ban plie noh ha u snem ban sa wan.
“Ki jingtei ia ka Iawmusiang kila dep kumba 78%. Ka project kala treikam shaid shaid ba kan dep noh ha u snem ban wan. Baroh ki jingeh jong ki nongshong dukan yn sa pynbeit hadien bala dep pyntrei ia kane ka project” ong u Bah Sniawbha haba iakren bad ki nongthoh khubor.
Ula bynrap ba ka jingpyrshang hi ka long ba yn ai dukan lut ia baroh ki nongshong dukan bad ia kino kino ki jingtyrwa ba thymmai, yn sa shong bishar hadien ba dep pynthikna ia ka Detailed Project Report (DPR).
Haba iadei bad ka Working Women’s Hostel, ula iathuh ba kane ka hostel ba la mang T.27 klur, kala iaid shaid shaid ha ka jingpyntrei.
Hadien ba jurip ia ka Mini Secretariat Complex, u Bah Sniawbha ula pyntip ba kane ka Complex ba kynthup ia ka West, East bad North Block kala dep kumba 90%.
Ka West Block (T.20 klur) ka la jan dep artad, katba ka East bad ka North Block yn sa pyntrei da ki bynta bynta.
