Shillong, Jylliew 25 : U Myntri Rangbah ka Jylla Conrad K Sangma ha ka sngi Palei, ula leit jngoh ia ka Integrated Command and Control Centre ka Telangana bad ong ba u don jingthmu ban wanrah ia ka rukom pyniaid kam ha kane ka centre sha Jylla lajong.
Hadien ba iohi dala ki khmat ia ka rukom pyniaid kam ha kane ka centre, u Conrad ula ong b aka ICCC ka paw duna eh na ki tiar ki tar ba ka don bad kham bun ka long ba kumno ka wanrah ia ki Tnad bapher bapher ba kin iatreilang.
“Kane lehse ka dei kawei na ki ICCC ba biang tam hapoh ka ri” ula ong.
“Kam dei tang halor ki technology ba ki pyndonkam, hynrei ka rukom treikam kaba la wanrah ban pyn iatreilang ia ki Tnad bad ban pyndonkam ia ki technology ban pynbha ia ka synshar khadar bad ka jingai jingshakri sha u paidbah” ula ong.
Ula ong ba kane ka Centre ka dei ka “nuksa kaba biang palat” ia kiwei pat ki Jylla ba khmih bniah.
“Ta ka daw nga la wan hi dalade ban peit ia kiei ki kam kiba iatrei ha kane ka ICCC” ula ong haba pyntip ba ka Meghalaya mynta kan pyntreikam lang ia kane ka rukom treikam (model).
“Nga lah ban kular ia phi ba ngin pyrshang ban pynwandur kat kaba lah na kaei kaba ngi iohi hangne ha Integrated Command and Control Centre ka Telangana bad ban pyntreikam lang ha ka Jylla Meghalaya” ula ong.
