Shillong Lber 09: U MLA ka South Shillong Constituency u Bah Sanbor Shullai hynne ka sngi Saitjain, ula leit jurip ia ka madan ialehkai kaba don ha ka Shnong Madan Laban na ka bynta ban tei pynbha ia ki jingdonkam ha katei ka madan kaban kot T.5 Klur.
Ha katei ka jingjurip la iadonlang ki Engineer bad ki ophisar jong ka State Sport Council, Rangbah Shnong bad ki nongkitkam jong ka Dorbar Shnong Madan Laban-Riat Laban, President bad ki dkhot jongka Seng Kynthei Madan Laban -Riat Laban, President bad dkhot jongka Seng Samla Madan Laban-Riat Laban ha kaba kila leit peit ia ka jinglong jingman na ka bynta ban tei iaka Dressing Room, Office Room, ka bynta jong ka khrum, ka jingker kynroh maw, ki nala, ka Gallery bad ban siang ia u phlang Plastic ne Artificial Turf ha ka madan ialaehkai lyngba ka SPA Scheme jong ka tnad Sports.
Ia kane ka project la shimkhia bad wanrah da u Bah Sanbor Shullai.
Haba ai jingkren u Bah Sanbor ula ai khublei bad sngewnguh ia u Myntri barim ka tnad Sports & Youth Affairs u Bah Banteidor Lyngdoh, Ka Kong Isawanda Laloo ka Director jongka Sports & Youth affairs, u B. Syiem uba long u Chief Engineer ryngkat bad ki heh ophisar jong ka Meghalaya State Sports Council, u Myntri Rangbah ka jylla u Conrad Sangma bad ia u Myntri ka tnad Sports & Youth Affairs u Bah Shakliar Warjri halor ka jingiarap ka jongki baroh ban ai jingkyrshan bad ban mynjur ban bhah pisa ia kane ka project.
