Nongpoh, Risaw 04 : Ka Ri Bhoi Youth Federation ha ka sngi Thohdieng, ka la dawa ia ka sorkar jylla ba kan pynkynriah noh mardor ia ka Additional DM&HO Dr. A.R Marak jong ka Nongpoh Civil Hospital halor ka jingkynnoh ba kane ka Doctor kam long kaba bit ban shakri ha katei ka jaka sumar paidbah.
Kane ka jingdawa kala mih hadien ba ka RBYF hapoh ka jingialam u President Bipul Thangkhiew, kala hiar jurip ia kane ka jaka sumar ka Sorkar halor ki jingujor kiba la mih ha ki katto katne taiew khamtam ka jingduh noh jong kawei ka longkmie ia i khunlung hadien ba ka la kha ha ka jaka leit bar jong katei ka hospital.
Kane ka Seng kala iakynduh ruh ia ka Additional DMHO Dr A.R Marak ban pan jingshai halor kitei ki jingjia hapoh ka Hospital hynrei kane ka Doktor kala kyntait da kaba pynpaw ba kam don dor ban kren eiei namar ba ka dei tang ka nongtrei kaba rit.
Namar kane, kane ka Seng kala hap ban iakynduh ia ka Medical Superintendent Dr D Blah ban iakren halor ki jingujor kiba bun na ki paidbah.
Haba kren sha ki lad pathai khubor, u Bah Bipul Thangkhiew ula pynpaw ia ka jingbynniaw kaba jur halor ka jingkyntait jong ka ADMHO ban ai jingshai ia kiei kiba la jia ha ka Hospital bad ong ba kane ka Doktor kam long satia kaba ibit ban ai ka jingshakri ha kane ka jaka sumar.
Ha kajuh ka por, ula pynpaw ruh ia ka jingsngewhun ba ka Medical Superintendent kala pynshai ia kiei kiei baroh haba kular ruh ba kan sa shimkhia ia ki mat bala pynsngew da ka Seng ban pynjanai shuh shuh ia ki rukom shakri paidbah ha kane ka jaka sumar ka Sorkar.
Halor ka jingkhlad I Khunlung ba kha ka Kmie ha Painkhana, u Bah Bipul ula pynpaw ia ka jingsngewsih kaba jur bad kyntu ia ka Medical Superintendent ba kan shimkhia bha ia kane ka jingjia bad ban pynthikna ba kam dei ban nang jia biang nangne shakhmat.
Kumjuh ruh ka seng RBYF kala dawa ia ka Sorkar Jylla ba kan pynsted noh ha kaban plie ia ka Maternity and Child Hospital (MCH) kaba la pynieng ha ka shnong Umran Parila, khnang ba kan lah ban ai ka jingshakri kaba thikna ia ki longkmie ba armet, kiba kha khun bad ki khunlung khynnah.
