Nongpoh, Naitung 17 : Ka Tnad pyniaid kali ka Ri-Bhoi District, kala ioh bat ia palat 30 ngut ki nongniah Auto Rickshaw ki ba kamai kali be-ain khlem kot khlem sla bad ba dang khynnah ka rta ha sor Nongpoh.
Ia kine ki nongniah Auto Rickshaw la ioh ban bat ha ka jingtalasi kot kali bala pynlong da ka Tnad Traffic ka Nongpoh Police Station ha ryngkat ka Nongpoh Region Auto Owners & Drivers Association, Nongpoh Circle, hynne ka sngi Balang.
Ia kane ka jingtalasi la ialam da u Sub Inspector ka Tnad Traffic Bah JK Phawa uba la pyntip ba ka Tnad kala dain kuna ia kine ki nongkamai kali be-ain, kaba kot sha ka T.10,000 tam.
U pyntip ba ki Pulit Traffic kila shem ba bun na kine ki nongkamai Auto ki dei ki bym don ia ka Licence niah kali (Driver Licence) bad don ruh napdeng jong ki, kiba dang don hapoh ka 18 snem ka rta.
Ula ong ba ka jingdain kuna ia kine ki nongkamai Auto be-ain ka long ruh kum shibynta ban ai jingsneng ia ki nongniah Auto ba ki dei ban kynmaw ha kaban pynbiang ia ki kot ki sla kali bad ha kajuh ka por ba kim dei ban niah Auto katba kim pat dap ia ka rta kaba biang.
U President ka Nongpoh Region Auto Drivers & Owners Association-Nongpoh Circle Bah F Lyngdoh, ula pyntip ba ka synjuk kala ioh pdiang ia shibun ki jingujor na ki paid nongleit nongwan halor ka jinglong khlem akor ki nongniah Auto rickshaw bad ka jingniah kali hapdeng ka jingshoh u khaw-iang.
Ula pynpaw ruh ia ka jingbynniaw halor ka jingnang jyllei ki nongdih droks bad ka jingrahbor ia ki khyllung khynnah ha ka thain, kiba la jia ha kine ki sngi bala leit noh. Ula ong ba dei halor kine ki nongrim ba ka synjuk kala shim ia ka sienjam ban iatalasi kot bad ki Pulit khnang ban wanrah ia ka jingshngain jong ki nongleit nongwan.
U Bah F Lyngdoh u pyntip ba ka Nongpoh Circle kala iakren ruh bad ka Sengkmie halor kane ka jinglong jingman hynrei dei haba iohi ba ka Sengkmie kam leh eiei, ka Circle kam banse ban shimkhia dalade bad ban iatreulang bad ka Tnad Traffic khnang ban tehlakam ia ki kam be-ain bad ruh ban wanrah ia ka jingshngain ia ki nongleit nongwan.
