Nongstoin, Naitung 28 : Ki Kynhun Sengbhalang ka West Khasi Hills kila pynpaw ia ka jingartatien ban iohi ia ka jingshakri jong ka MCH Hospital ha Nongstoin namar ka jingiai bteng ban ieh shrah da ka Sorkar Jylla watla ka jingtei ia kane ka hospital kala dep la katto katne por.
Kane ka jingartatien kala mih ruh hadien ka jingsakhi ba ka Tnad ka Koit ka Khiah kala pynkynriah lut ia kiba bun ki tiar ki tar jong kane ka hospital sha Mawkyrwat.
Haba iakren bad ki nongthoh khubor hynne ka sngi Thohdieng, ki Sengbhalang kila pynpaw ia ka jingartatien kaba jur halor ki sienjam bala shim da ka Tnad ka Koit ka Khiah bad ong “Imat ka jingangnud jongngi ban iohi ia ka jingplie ne jingshakri jong kane ka hospital kala poi pynban sha kaba kut”.
Kine ki Sengbhalang ki kynthup ia ka HANM, WKSU, MYF, UHM bad ka WYF, kiba la ieng pyrshah jur ruh ha ka por b aka tnad ka koit ka khiah ka dang pynkynriah ia ki tiar ki tar na kane ka hospital sha Mawkyrwat.
U bah Wills Sohshang nongïalam ka HANM u la ong, “Katkum ka jingïakren ha ka jingïalang kaba la khot da u DC ha ka 19 tarik mynta u bnai 2023 ha Conference Hall, baroh ki sengbhalang kim pdiang satia halor ka jingai jingmut jong ka sorkar ban ïa bujli noh ïa ka MCH bad ka Civil Nongstoiñ. Kaba ar ka long ba baroh ki sengbhalang ki pyrshah ban kit noh ïa ki tiar sha Mawkyrwat”.
“Kaba lyngngoh ka long ba u DC Nongstoiñ u la ïathuh ba ka Sorkar ka la kular ba hapoh lai bnai yn pynpoi ïa ki tiar kiba thymmai ha MCH Nongstoiñ. Hynrei kaba kyndit ka long ba ha ka 25 Naitung 2023 ha ka jingïakynduh bad ka Myntri ka Koit ka Khiah ha Secretariat, kala pynpaw ba ym lah ban leh ïa kane hapoh lai bnai. Ka la kren shai ba kan shim por ïa ka hynriew bnai. Kane ka la pynartatien haduh katta katta bad ngim sngew shaniah shuh ïa kane ka kam”, u la ong.
U Bah Sohsang ula ong “Kum ki sengbhalang bad ki paidbah ka thaiñ West Khasi Hills hi baroh kawei, ngi dap da ka jingsngewkmen haduh katta katta ban ïohi ïa ka building jong ka MCH kaba lah dep trei. La wanrah ruh ïa ki tiar ban pyndonkam ha kane ka Hospital ka ban ai ïa ka jingshakri kaba khambha khamtam ïa ki longkmie ba kha khunlung. Hynrei, kane ka jingkyrmen imat kan shu kut noh lyngba ka jingleh meinah jong ka Sorkar ïa ka dong ka thaiñ jong ngi.
“Ngi dawa ïa ka sorkar ba kam dei ban leh politic ïa ka ïap ka im jong ki paradoh jong ngi, namar lada ka kam ka dawa ngim banse ban mih sha surok na ka bynta ka bit ka biang jong ki paidbah”, ula ong.
