Shillong, Jymmang 01: U Symbud Myntri Rangbah ka jylla ba khmih ia ka Tnad kam Pohiing (Police) Bah Prestone Tynsong ula ong, ba ka sorkar kan pynthikna ba kan don ka jingburom ia ka aiñ ha ka jylla bad kan ym ailad iano iano ruh ban shim ia ka aiñ hala ka kti bad ka sorkar kala shim ia ki katto katne ki sienjam ban pynthikna ba kan ym don kano kano ka jingktah ia ka shongsuk shongsain ha ka jylla.
Kane ka jingkren u Bah Prestone ka la mih hadien ki jingjia kawang petrol bomb jong ki riewshimkabu ia ki Police Station bad ia ka Ophis ka sorkar jylla.
Kaba la jia dang shen, kadei ka jingshah kawang petrol bomb 2 tylli ki police station kiba kynthup ia ka Sadar PS bad ka Rynjah PS lem bad ka ophis treikam jong ka MGCC kaba don ha Rilbong.
Haba iakren bad ki nongthoh khubor, u Bah Prestone Tynsong ula ong, “Ngi lah dep ban bthah ia u Director General of Police (DGP) bad ia ka tnad Pulit ba kin don beit ha ka kam bad pynthikna ba kum kitei ki jingjia, kim dei shuh ban jia nangne shakhmat”.
“Ngi ngin ym ailad iano iano ruh ba kin shim ia ka aiñ hala ka jong ka kti. Ka aiñ kan synshar bad nga la dep ban bthah da ka ba shai kdar ia u DGP bad ia ki SP ba ki dei ban pynthikna ba kum kitei ki jingjia kim dei ban jia biang” ula ong.
Nalor kane, u Symbud Myntri Rangbah ula ong, ba um kwah ban pyniasoh ia kitei ki jingjia kawang petrol bomb bad ka jingshah kem ki dkhot ka Khasi Students’ Union (KSU) ha kaba iadei bad ka jingshah pyniap jong ki 3 ngut ha Ichamati bad Mawlai Mawroh bad ula ong ba ka aiñ kan sa leh ia kaba donkam.
“Ngan ong ha phi kawei, ngam ong ba ki dei ki dkhot ne kim dei ki dkhot jong ka KSU. Haba ngi kem ia uno uno briew, phi hap ban sngewthuh ia kawei ba ngi bud ryntih ha baroh ki liang, kumno, haei bad balei bad kumta ngi pynlong iaka jingtohkit na ka jaka kaba jia bad hadien kane ka poi sha ka iingkashari bad ai ba ka iingkashari kan rai halor katei ka kam. Ngam ong ba kitei ki briew kiba la shah rah ne kiba la shah kem ki dei na ka seng KSU ne na kiwei pat ki kynhun jong ki briew hynrei ai ba ka aiñ kan leh ia kaba donkam” ula ong.
“Ngam ngeit ba ka jingkawang petrol bomb ka dei tang namar ba shah kem ki dkhot ka KSU. Nga ngeit skhem bha ba ki dei ki briew kiba la rangbah ha ka jingmut jingpyrkhat” ula ong.
U Bah Prestone ula ong, “Ngi ngin ym ailad ia kitei ki jingjia ba kin jia, kumta ngin pynthikna ba kan ym don kano kano ka jingpynthud ia ka shongsuk shongsain”.
Ula kyntu ia ki nongshong shnong ba kin long kiba jai jai.
“Ka sorkar bad ki pulit kila don ha ka kam ban pynthikna ba ki paidbah kin long kiba shngain” la ong u Symbud Myntri Rangbah.
Haba kylli la ka sorkar jylla ka don jingthmu ban buh shuh shuh ia ki bor pulit, u Bah Prestone ula ong, “Ia mynta ngi dang khmih bniah halor kane ka bynta hynrei kumba nga la ong ia phi, ngi ngin ym thiah, ngin pynthikna ba kan don ka jingbud ryntih ia ki aiñ ki kanun”.
Ula iathuh ba la dep ruh ban bthah ia baroh ki tnad sorkar bad ia ki ophis treikam jongka sorkar ba kin long kiba husiar bad kiba phikir bad ban pynthikna ba kidei ban pynieng ia ki kali ha ki jaka kiba dei.
