Shillong, Jymmang 15 : U MLA ka NPP na Jowai Bah Wailadmiki Shylla ha ka sngi Balang ula ong ba un sa iasyllok shuwa bad baroh ki kynhun hashuwa ban buddien ia ka jingdawa ban pynlong ia ka Jowai, ka District Headquarter ka West Jaintia Hills, kum ka Summer Capital ka Jylla.
Haba kynthoh halor ka jingdawa ba dang shen da ka Jaintia Students Union (JSU), u Bah Wailad ula ong “Ngam pat lah ban ong eiei than ia kane namar ka shong ha ka Sorkar hynrei lada ka long kaba lah bad kaba iahap, Ngan da kmen shibun eh”.
Ula ong ruh ba ka jingdawa ka dang dei kaba dang shu sdang bad ka donkam ban lum ia ki jingpynsngew bad ki jingai jingmut jong ki paidbah halor kane ka kam.
“Ia mynta, ki don tang katto katne ki Sengbhalang kiba dawa ia kane. Kumba nga ong ka dang dei kaba dang shu sdang. Ngan sa iakren bad ki sengbhalang bad kiwei kiwei ki kynhun” ong une u MLA haba kular ba “Lada baroh ki kyrshan ia kane, ngan sa buddien ia ka kam bad ka Sorkar Jylla”.
