Ioh u Bantei Jyrwa ia ka khusnam Best Rider
Tura, Aug 11: Ka lympung ïalehkai kaba nyngkong jong ka South Western Motocross Championship 2024 ka la kut noh ha ka janmiet sngi Saitjaiñ ha Upper Kalaichar, South West Garo Hills.
Ka jingïakop kaba lai sngi, kaba la pynlong naduh ka 8 haduh ka 10 tarik u Naitung, ka la pynlong ïa ka shnong barit kaba itynnad jong ka Kalaichar ban sawa da ki sur jong ki engine, katba ki nongñiah kali ki dang iapynher iala ki kali ha ki surok khyndew shabar jong ka shnong.
Ïa kane ka jingiakop la pynlong da ka Ranggira Motorsports and Adventure Club (R.M.A.C), da ka jingkyrshan jong u Myntri Rangbah ka Jylla Meghalaya, u Conrad K Sangma, u MLA ka Mahendraganj Sanjay Sangma bad u MLA ka Rangsakona Subir Marak.
Ha kane ka sngi la wan ban iashim bynta haduh 66 ngut ki nongniah kali kiba wan na Guwahati, Shillong, Jowai, Nongstoin, Resubelpara, Tura, Ampati bad na Mizoram. Ban shu batai bniah ki don 4 ngut ki nongniah kali na Mizoram, 1 na Guwahati (Assam), 9 ngut na Shillong, 2 ngut na Jowai, 2 ngut na Nongstoin, bad 48 ngut na Garo Hills.
Ki nongniah kali kila iashimbynta ha ki hynriew tylli ki kyrdan : ka jingiakop ia kiba dang shu sdang, ki Scooty, ki 2-Stroke, ki Novice, ki nongniah bala tbit, Ki nongniah kali na Southwest.
Ka jingïalehkai ka la sdang ha ka Sngi kaba 1 (8 tarik u Naitung) da kaba khang ïa ki jingpynrung kyrteng ia kiba wan slem, ka jingpeit bniah shwa ka jingïalehkai, bad ka jingïalehkai ba pura.
Ka sngi kaba 2 (9 tarik u Naitung) ka la sdang ïa ki jingïalehkai ba shisha, ha kaba la don ïa ki jingïakob ha kylleng ki 6 tylli ki kyrdan: Ka kyrdan jong ki nongsdang (7 sien), ka kyrdan ki Scooty (3 sien), ka kyrdan ïalehkai 2-Stroke (7 sien), ka kyrdan Novice (10 sien), Ka kyrdan jong ki riew shemphang (12 sien) bad ka kyrdan jong ka Local Southwest (3 sien).
Ka sngi kaba 3 bad ka sngi kaba khatduh (10 tarik u Lber) la pyni ia ka jingiakop mareh Open class kaba la khmih lynti bha (10 sien), ryngkat bad ka jingkut jong kiwei pat ki jingiakop mareh kyrdan.
U MLA ka Mahendraganj, u Sanjay A Sangma, uba la pynphuh pynphieng ïa kane ka sngi ha ryngkat ki riew rangbah na ka thaiñ Kalaichar, u la pynpaw ïa ka jingsngewnguh ïa ki nongpynïaid bad pynpaw ïa ka jingktah kaba bha kaba kum kine ki jingïalang ki don ïa ki samla. U la kyntu ruh ba ki dei ban kiar na u drok bad ban kiar na kaba niah kali khlem pyrkhat ha ki surok paidbah nalor ba ki dei ban deng beit ïa ki tiar ïada haba ki shong kali.
Donkam ban kdew kyrpang ia ka nongniah kali kynthei kaba marwei ha kane ka jingialehkai, ka Nasawea K Marak. Ka dei tang ma ka, ka kynthei kaba la ïakhun bad ka la hap ban weng noh hadien ka DNF (Kam shym la Dep) namar ka jingjia aksiden kaba rit, hynrei ka la ïoh ïa ka jingsumar mardor ha ka jaka.
Kane ka jingïalehkai kaba don tang 500 meter na u pud u sam jong ka India bad ka Bangladesh, ka la khring da ki spah ngut ki nongpeitkai na kane ka thaiñ, watla ki nongpeitkai kiba iaid shabar pud kim shym la lah ban sakhi ïa ka jingkmen namar ka jingker khappud bad ka jingpahara kaba pyrkhing bha jong ki BSF.
La pynkut ïa kane ka Championship da ka jingsam ïa ki khusnam, ha kaba ïa ki nongjop ha man la ki kyrdan la sam ïa ki khusnam bad ki khusnam pisa.
Ki Nongjop ki long kumne harum:
Local Southwest class:
1st – Kanam G Sangma
2nd – Dechangra D Sangma
3rd – Rikman Ch Marak
Scooty class:
1st – Bergie Riprang R Marak
2nd – Jayden Nongkhlaw
3rd – Bikki K Marak
Beginners class:
1st – Rakkim Ch Marak
2nd – Ezekier A Sangma
3rd – Niangsal G Momin
Novice class:
1st – Chengseng Ch Marak
2nd – Shaun Lalremkuata Changte
3rd – Balkim A Sangma
2-Stroke class:
1st – Patsha Kharkongor
2nd – Tenzy Sangma
3rd – Banjop Umbah
Expert class:
1st – Banteilang Jyrwa
2nd – Evander M Sangma
3rd – Reneky Nongdtu
Open class: (only one champion)
Banteilang Jyrwa
Youngest Rider:
Jayden Nongkhlaw
Best Rider:
Banteilang Jyrwa
Solo female rider:
Nasawea K Marak
