Shillong, Jymmang 5: U nongtrei mon sngewbha Cherian Momin, ula kynnoh ba ka jingkylla ka jinglong jingman ha rilum Garo kadei tang namar ka jingpom pathar ia ki dieng ki siej bad ka jingtih be-ain ia ki mar poh khyndew kaba la pynjulor ia ka mei mariang.
Ha ka kyrwoh khubor u Cherian Momin ula ong, watla kila don ki khlaw kiba rben bad kiba jyrngam bad ka jingpahuh pahai jong ki um ki wah, ka thaiñ mynta kala mad ia ka jingeh na ka jingshah ktah ha ka jingpom pathar ia ki dieng ki siej, ka jingtih be-aiñ bad ka jingktah na ka jingkylla ka suinbneng.
“Ka jinglong jingman ka suinbneng kam dei kaba dang jngai, hynrei kala wan jia mynta bad kala ktah ia ngi baroh” ula ong bad ka bynrap “Ka jinglong jingman ka mei mariang ha rilum Garo ka long kaba kyrkhai hynrei ia kane la pynjulor noh da ki riewkhwan myntoi shimet. Kadei ka por ban gin shim kyrkieh ia ki sienjam ban iada ia ka mei mariang bad ia ka pateng”.
Katkum ki kaiphod, ka rilum Garo kala mad ia ka jinghiar ha ka jingdon ki dieng bad ki khlaw kiba rben namar ka jingtih be-ain ia u dewiong kaba la pynjulor ia kiba bun ki jaka. Kane ka jingtih pathar kala pynjulor ia kiba bun ki jaka bad kane kala ktah kylla ia ka jinglong jingman jong ki sawdong sawkun ka mei mariang kaba lalam ruh sha ka jingtyrkhong ki tyllong um bad ban kiew ka jingkhluid.
“Ka jingpynjulor ia ki khlaw ki btap kala ktah jur ia ki tyllong um, ki wahduid bad ki wah kila sdang ban rngad, ha kaba ka imlang sahlang kala duh noh ban ioh ia ka um kaba khuid ba suba ban dih. Kane kam dei tang ka mat kaba ktah ia ka mei mariang hynrei ka dei ka jingeh kaba khraw ia u khun bynriew” ula ong.
Ula ong nalor kaj ingkyrduh um, ki nongrep kila hap ban iaid bad ban im ryngkat bad ka jingkylla ka suinbneng, ka jingslap ka bym biang bad ka jingshit kyrang kala buh ha ka jingma kaba khraw ia ka kamai kajih ka jongki. Bun kila mad ia ka jingduhnong na ka jingbym mih thikna ki jingthung jingtep bad kane kala buh ha ka jingeh ia ki ha kaban ioh ia ka kamai kajih.
“Ka jinglong jingman ha rilum Garo ka long kaba ma, hynrei kam pat dei pat kaba slem ban leh eiei noh” ula ong bad ka bynrap “Ngi donkam ba ka sorkar kan leh eiei kyrkieh noh mynta ban tehlakam ia ka jingtih be-ain ia ki marpoh khyndew bad ban pyntreikam ia ki aiñ ban iada ia ka mariang. Ngi donkam ruh ban bei tyngka ha ki kam ki jam ban iada bad ban pynneh pynsah ia ki khlaw ki btap bad ia ki tyllong um na ka bynta ki pateng ban dang wan”.
U Momin ula kyntu ia ka sorkar jylla ba kan buh hakhmat eh ban pynneh pynsah iaka jinglong jingman ka mei mariang ha rilum Garo bad ban shim ia ki rai kiba kongsan ha kaba iadei bad ka jingkylla ka suinbneng.
“Ngim lah ban kyntait ne leh kiar shuh ia ki dak jingmaham bad ka por myta kadei ban leh eiei noh ha shwa ban dier ka por” ula ong.
