Jingshah pyniap u Raja Raghuvanshi | Pynjulor ki 3 ngut ia ki sakhi namar ka jingrhah, ong u bah Vivek Syiem

Shillong Jylliew 24: U Superintendent of Police (SP) ka East Khasi Hills u Bah Vivek Syiem hynne ka sngi Ba-ar, ula pyntip ba ki 3 ngut ki briew kiba la kem ba pynjulor ia ki sabut kiba kongsan halor ka jingshah pyniap u Raja Raghuvanshi ha Sohra, yn sa wan ialam noh sha Shillong ha ka sngi Palei ban pynlong ia ka jingtohkit kaba bniah.

U Lokendra Singh Tomar, uba shong basah ha Gwalior, Madhya Pradesh uba dei u trai jong kawei ka jaka sah ne Flat ha Dewas Naka, kaba ka Sonam Raghuvanshi, kaba la suba don bynta hakhmat eh, kala leit ban sah bad rieh ha katei ka Flat kaba don ha Indore. U Lokendra ula shah kem ha ka sngi Nyngkong na Gwalior halor ka jingpynduh bad jingbuhrieh ia ki sabut kiba kongsan.

Ha ka sngi u Blei, ki pulit kila kem ia u Silome James, uba dei u nongdie ia ki iing bad jaka, uba la ai wai ia ka Flat sha u Vishal Singh Chauhan, uwei na ki suba donkti uba hakhmat halor ka kam pyniap bad u Balia Ahirwar uba dei u nongap pahara ha ka jaka ba don katei ka Flat ula shah kem halor ka jingpynduh bad jingpynjulor ia ki sabut.

“Ngi lah pan 7 sngi ka Transit Remand. Baroh kitei kiba la shah kem halor ka jingsuba donkti yn sa wanrah sha Shillong bad yn sa ialam tian bishar ia ki hapoh ka iingkashari la shisngi (sngi Palei)” ong u Bah Syiem haba iakren bad ki nongthoh khubor.

U SP ula ong ba ka Sonam kala sah ha ka Flat ha Gwalior kala paw pyrthei tang hadien ba la pynlong ia ka jingtohkit da ka special investigation team (SIT). Hynrei haba ka kynhun ki pulit kala leit sha katei ka jaka kala shem ba kala long kaba thylli.

U Bah Syiem ula ong ba ki pulit kila don ia ki sabut halor ka jingdonkti jong kitei ki 3 ngut kiba la shah kem ha kaban pynduh pyndam ia ki sabut kiba kongsan kiba iadei bad ka kam pyniap briew.

“Ngi don ia ki sabut pyrshah ia ki ba kila sei ia ka synduk shabar, ha kaba ka Sonam kala buh ia ka ksiar bad ia u kynjri jong u Raja hapoh” ula bynrap.

“Kine ki 3 ngut kim donkti ha ka kam pyniap briew hynrei kidei kiba donkti pat ha kaban pynduh ia ki sabut kiba kongsan” ula ong haba bynrap “Ka daw hi kaba nga iohi kadei namar ka jingrhah. Kine ki briew kila rhah haba kaba la suba donkti kala shah kem, ki lah ban pyrkhat ban khmih ne peit kaei kaba don hapoh jong katei, lah ban don ka pisa bad kiwei kiwei, khlem da tip ba ki pulit kin lapksai hadien. Kumta hadien ba kila sngewthuh ba ki briew kin wan bad kin sa lah ban lap eiei, kine ki 3 ngut kila leh ia katei ka kam bad kane ka pyni ba kila leh ia kaba bakla bad kiba donkti”.

“Ngi lah dep ban shim ia ki lyngkhot kiba sah na ka jaka kaba la thang ia ki tiar. Ka Kynhun Forensic na Madhya Pradesh kala wan bad ngi la phah ia ki sha ka Forensic bad ngin sa sngewthuh kidei kiei. Ka lah ban dei ka phone, hynrei kam don kano kano ka dak jong kino kino ki jingdeng” ong u Bah Syiem.

Nalor kane u SP ula phla ba ki pulit kila shem ba ka Sonam bad u baieid u jongka u Raj Singh Kushwaha kila don ia ka jingiadei bad kila don ruh ia la ki jong ki kompani ki jongki bad ki thrang ban pyniar ia ka kam khaii ka jongki.

“Kine kidei kiei kei kaba kila buh jingmut na ka bynta ban pynjah noh ia u Raja namar ba ki kwah ban pyniar ia ka khaii pateng bad kidei ruh kiba don ia ka jingiadei. Kam don kano kano kaba palat ia kane kaba la mih” ula ong bad ka bynrap “Ngi lah dep ban tih bniah ia kane ka jingjia bad kadei ka kamram ka jong ngi ban tei ia ki sakhi bad ia ki sabut bad dei na kane ka daw ba kam dei tang na ka jingphla ia ka jingkubur hynrei kadei ka jingtei ia ki sakhi bad ki sabut pyrshah ia ka jingkren ka jongki”.

U SP ula pynpaw ia ka jingskhem jingmut ba ki pulit kin lah ban Chargesheet noh kham kloi.

Halor ka jingdawa ban leh ia ka Narco Test, u Bah Syiem ula ong, ba ym iohi eiei ban donkam ban leh ia kane ka Test ha kane ka khyllipmat kaba mynta.

“Ban leh ia ka Narco Test kadei kaba la khang pyrshah (Ban) da ka Supreme Court. Ia ka jingleh ia ka Narco Test yn ym pdiang hapoh ka iingkashari. Ka shu ai tang ia ki symboh jingmut ne ki dak ki shin. Haba kila dep ban kubur ba kila leh ia kam sniew, ngi lah dep leh ia ka Reconstruction ne ka jingpynwandur biang ia ka kam sniew, ngi lah dep rekod ia ki sabut ha ka jaka kaba la jia. Ngam iohi pat balei ngin donkam ban leh ia ka Narco Test ha kane ka khyllipmat kaba mynta” ula ong shuh shuh.