Shillong, Jylliew 15: Ka rukom pyniap ia u Raja Raghuvanshi mynta kala sdang ban kyllain shuh shuh, ha kaba kawei ka nongsakhi kala mih shakhmat ban ai jingtip shuh shuh halor ka iaid ka ieng jong ka Sonam Raghuvanshi kaba la suba jur ba kala donkti ha kaban pyniap, tang ha ki katto katne ki kynta shwa ba kan aiti ialade.
Ka Ujala Yadav, kaba la ioh ban shong lang bad ka Sonam ha ka bos ban leit na Varanasi sha Ghazipur, kala ai ia ki jingtip kiba kongsan kiba long pyrshah ia kaei kaei kaba la phla da ka Sonam hakhmat jong ki pulit bad kala don ka jingthmu ban phet sha ri Nepal.
Katkum ka jingong jongka Ujala Yadav, ka nongshong shnong ka Ghazipur, ula ong, ba kala kem ia ka bos na Varanasi ha ka por kumba 10 baje mynmiet ha ka 8 tarik u Jylliew. Kala kyndit, ba ka Sonam Raghuvanshi, kala tap da ka jaiñ rit (scarf) kala shong lang ha katei kajuh ka bos na Varanasi bad kala shong hajan jongka.
Ka Varanasi ka jngai kumba 950 km na Indore, ia kaba la ioh jingtip ba kala sah ha kawei ka iing na ka bynta 14 sngi – naduh ka 26 tarik u Jymmang haduh ka 8 tarik u Jylliew, hadien ka jingpyniap ia u Raja ha Sohra, Meghalaya ha ka 23 tarik u Jymmang.
Namar ba la miet, kala tap ia la ka durkhmat da ka jaiñ rit bad kumta kam shym la lah ban ithuh ba kadei ka Sonam. Kala wan sha ka Ujala ban kylli shaphang ka bos ka por bad ka jingshim ia ka tiket. Haba ka Ujala kala ong ia ka, ban peit ia kitei ki jingtip lyngba ka Online bad kylli la ka tiket ka jongka ka long kaba lah thikna, ka Sonam kala ong, ba kam shym la don satia ia ka mobile phone ha katei ka khyllipmat.
Ka Sonam kala leit ban kiew noh ha ka bos hashwa ba ka bos kan mih noh.
Nalor kane, ka Ujala Yadav kala phla ruh ba kila don arngut ki briew kiba ym lah ban ithuh kiba la wan buh ia ka Sonam ha ka steshon bos ha Varanasi. Kine ki briew ki iapher na ki 4 ngut ki briew kiba lah dep ban kem ha kaba iadei bad ka jingshah pyniap u Raja Raghuvanshi, kaba pyni ba ki lah ban don shuh shuh ki briew kiba donkti ha kaban pyniap ia u Raja bad kane ka jingiasylla kala long kaba kham jylliew shuh shuh ban ia kaei kaba pyrkhat.
Hapoh jong ka bos, ka Sonam kala pan um na ka Ujala bad dei ha katei ka por ba kala law ia ka jaiñ rit ban pyni ia la ka durkhmat. Hynrei kam shym la lah ban ithuh ba kadei ka Sonam namar ba kam shym la shai bha hapoh ka bos namar ba u nongniah ula pynlip ia ka bording elktrik (Light) bad kane kadei kaba ju leh haba ki bos ki iaid ha ka por mynmiet.
Nalor kane, kam shym la poi pyrkhat ruh ba ka lah ban dei ka Sonam kaban shong marjan bad ka. Katkum ka khubor kaba kala buddien, ki briew ki dang wad ia ka
Sonam ha Meghalaya, ia kaba la mutdur ba kala duh ia la ka jingim ha ki jaka riat jong katei ka jaka rilum. Ha kajuh ka por, kam shym la pyrkhat ba ka Sonam kan wan na Meghalaya ban leit sha Varanasi. Shuh shuh ka Sonam kam shym la tah ia ki jingtah pynbhabriew ne Make-Up katba ka Ujala kala iohi tang ia ki dur bad video jongka ha ka por ba ka phong ia ki jaiñ kyntiew kurim bad la jur bha ruh ka jingtah pynbhabriew. Kine kiei kiei baroh kila pynlong ia ka Ujala ban ym ithuh ia ka Sonam, kaba shong marjan bad ka.
Ka Ujala kala kynmaw ha ka por ba ka shong ha ka bos, kala peit ia ka khubor shaphang ka jingshah pyniap u Raja Raghuvanshi ha ka phone ka jongka. Ka Sonam kala ong ba ym dei ban peit ia kum kine ki jingjia ‘ki bym don jingmut’ kaba la pynlong ia ka Ujala ban buh noh ia la ka phone.
Kala ong ruh, ba ka Sonam kam shym la kren eiei than hapoh ka bos, tang ha ki khep ban kylli shaphang ka jingjngai bad ia ka por ban poi ha Gorakhpur. Ka Ujala kala hiar noh na ka bos kumba 8-10 km shwa ban poi ha Nandganj.
Ka Sonam Raghuvanshi kala pyndem ialade hakhmat jong ki pulit ha ka por 3 baje mynstep ha ka 9 tarik u Jylliew ha Nandganj ha Ghazipur, Uttar Pradesh, tang hadien katto katne kynta ba kala ia shong bos lang bad ka Ujala Yadav.
Ka Ujala kala kynmaw bad ithuh ia ka dur ka dar jong ka Sonam hadien ba kala iohi ia ki khubor bad ka jingsaphriang ki video ba ka Sonam kala aiti noh ialade. Kala ong ba ka Sonam ka paw ba ka long kaba don ha ka met kaba koit ba khiah, ha ka por ba ka shong ha ka bos, kaba long pyrshah ia ka jingkam ka jongka ba kam khlain ne jingmynsaw ha katei ka por.
Kane ka jingphla jong ka Ujala kala nang pynkyllain ia ka jingbatai shaphang jong ka Sonam bad ki 4 ngut kiba don hapdeng ka jingshah tohkit ki pulit ka Meghalaya, kaba la iathuh ia ki pulit ba ka Sonam kala mih na Siliguri bad kala rai ban aiti ialade ha Ghazipur.
Kane ka jingioh ia ka jingtip kaba thymmai, kala ai ksai ba ka Sonam ka don ia ka jingthmu ban leit sha ri Nepal na Gorakhpur, kaba dei ka jaka kaba pawnam na ka bynta ban jam sha shilliang u pud ha ka thain khappud.
La ioh jingtip ba ki pulit ka Meghalaya kila ioh ban iakren bad ka Ujala Yadav ban lum ia ki jingtip bad kala iakren ruh bad ki bahaiing bahasem jong u Raja.
Ki bahaiing bahasem jongu Raja Raghuvanshi kila dep ban dawa ba dei ban leh ia ka Narco Test ia ka Sonam bad ia kiwei pat kiba la suba donkti bad kila ong lyngba kane kan sei lut ia ki jingshisha baroh.
Ha kawei pat ka liang, ki Pulit ka Meghalaya kim shym la kren eiei halor kane ka jinglap kaba thymmai namar ba ki dang bteng ban tohkit ia ki 5 ngut kiba la suba donkti ha kaban pyniap ia u Raja.
Ki 5 ngut kiba la shah kem ha ka jingsuba pyniap ia u Raja ki kynthup ia ka Sonam Raghuvanshi kaba dei ka kurim jongu Raja Raghuvanshi ia kaba la suba jur ba kadei kaba donkti ha khmat eh, u Raj Kushwaha ia kaba la kynnoh ba udei u samla jongka Sonam Raghuvanshi bad la ngeit ruh ba udei uba la lamkhmat ia ka kam ban iasuhbuit halor ka kam pyniap bad ki 3 ngut kiba kynthup ia u Vishal Singh Chauhan, Akash Rajput bad u Anand Kurmi kiba la shim wai ban pyniaid shakhmat ia ka kam pyniap.
