Shillong, Jylliew 06 : Wat hapdeng ki jingpyrshang jong ki kynhun ai jingiarap bapher bapher, ka jingwad ia ka Sonam Raghuvanshi, kaba jah rngai naduh 25 tarik Jymmang, kam pat seisoh satia kat haduh hynne ka sngi Thohdieng.
Kane ka jingwad, kaba la kot sha ka sngi ba 13, la hap ban pynsangeh noh hynne ka janmiet por 4:30 baje eiei namar ka jingjur u lyoh khyndew ba kahdum, bad ka jingwad kan sdang biang lashai ka sngi Saitjain.
Ka kynhun ba ialam da u SDPO ka Sohra Civil Sub Division Bah Pynhun Syiem bad DSP (Operation) kila pynleit jingmut ia ka jingiawad ha ki jaka ba marjan ka Kshaid Weisawdong-ka jaka ba lap ia ka metiap u kurim ka Sonam, u Raja Raghuvanshi haba sdang jong kane ka taiew.
Ka kynhun ba iawad ia ka Sonam ki kynthup naduh ka NDRF, SDRF, SRT, Fire & Emergency Services (FES), Special Operation Team (SOT), Special Investigation Team (SIT) bad ki trai shnong ba wan iarap sngewbha.
Haduh mynta, ym pat lapdien satia ia ka Sonam hynrei ki kynhun ba leit wad, kila ioh tam ia ka jainjri (raincoat) najan Mawkma, kaba jngai kumba 9.8 Km na Weisawdong myn ha ka sngi Balang.
La suba jur ba kane ka jainjri ka dei jong ka Sonal hynrei ki kynhun tohkit haduh mynta kim pat lah pynthikna satia.
