Shillong, Naitung 15 : Ka Sportality ha ryngkat ka Meghalaya State Olympic Association, ka Meghalaya Wrestling Association bad ka Directorate of Sports & Youth Affairs, kila pynlong ia ka Wrestling Camp ne ka jingai jinghikai ialehkai lympat ha Shillong, kaba la pynlong kum ka jingpynkhreh ia ki nongialehkai ban iashimbynta ha ka National Games, 2027, ka ban long ha Jylla.
Kane ka Camp kaba la sdang naduh ka 11 tarik Naitung kan sa kut noh ha ka 16 tarik Naitung bad kumba 120 ngut ki nongialehkai lympat bad kynthei bad shynrang, kiba wan na kylleng ki jaka jong ka Meghalaya kila ioh ia ki jinghikai pyntbit ia ki sap ba ki don nalor ka jinghikai ba kin tip shuh shuh ia ki buit ialympat, ki ban pynthikna ba kin long ki nongjop.
Kaei kaba pynlong ia kane ka Camp kaba kyrpang ka dei ka jingdonlang jong ki Coach ba pawnam ka pyrthei, kiba wan na Japan. Kine ki Coach ki kynthup ia u Japanese National Coach, Yoshimaro Yanagawa, ka nongialehkai ialympat kaba la ioh khur ia ka Takma Ksiar ha ka Olympic 2024 ka Sakura Motoki bad ka Ami Ishii kaba bat mynta iaka nam World Champion 2025.
U Coach ka ri Japan u Yoshimaro Yanagawa ula ai ia ki jinghikai bad jingbatai ia ka rukom ialehkai Wrestling ha kaba ula pyni ruh ia ka buit bapher bapher kumno ban pynliem ia ki nongiakhun pyrshah.
Nalor kane ki samla kila ioh ruh ia ka lad ban iakhun pyrshah bad ki khlur ialympat ka pyrthei ha kaba kila pynpaw ba kila ioh jingmyntoi bha na kane ka jingiakhun bad na ka jingioh jinghikai ban pyntbit shuh shuh ha ka jingialympat.
Ki samla kynthei bad shynrang kila ioh ruh ia ka jinghikai na u Robert Kabbas uba long u khlur ialehkai ka ri Australia uba la ioh ia ka Takma Rupa ha ka Olympic 1984, uba la hikai kumno ban rah ia ki nar kiba khia ban pynkhlain ia ka bor met ka jongki ha ka jingialehkai ialympat.
Haba iakren bad u Coach ka ri Japan u Yoshimaro Yanagawa ula ong ba ki samla ka jylla kidei kiba shah shkor bad pynleit jingmut bha ia ka jinghikai bad kidei ruh kiba don ia ka jingkhlain hynrei kaba dun ha ki kadei sa tang ka buit ialehkai bad kumta ki donkam ban pynleit jingmut bha ha kane ka jingialehkai ba kin lah ban kiew shaphrang ha ka kam ialehkai ka jong ki.
Hynne ka sngi Baar, ki nongialam jong ka Sportality bad ka MSOA kila leit ban sakhi ia ka rukom ioh jinghikai ki samla na u Coach bad na ki arngut ki khlur ialehkai Wrestling ka pyrthei bad kila pynkup burom bad ai khublei ruh ia ki, hashwa ba kin mih noh na kane ka jylla ban leit phai noh sha ri Japan.
Ka lynti sha ka National Games 2027 kala sdang hangne ha Shillong bad ha ka Jylla baroh kawei.
