Shillong, Risaw 29 : U Myntri ka kam jngohkai Bah Paul Lyngdoh ha ka sngi Ba-ar, ula pyntip ba un dang ban ioh pdiang ia ki jingai jingmut jong ka Meghalaya Tourism Development Forum (MTDF) ban wanrah ia ka High Speed Luxury Rail Network (rel ba sted bad rem dor ) ban pynduna ia ka por leit por wan na Guwahati sha Shillong.
Haba iakren bad ki nongthoh khubor, u Bah Paul ula ong “Ngan dang ban ioh pdiang ia kane ka jingtyrwa da ka jingthoh n aka MTDF. Kano kano kaba dei na ka bynta ka jingmyntoi ka Meghalaya bad ka ban iarap ia ki kam jngohkai yn sa khmih ia ka na kata ka liang”.
“Hynrei lada phi aikren halor ka lynti rel, kaba dei ka mat ba jyrwit jyrwat la bun bun snem, kane ka dei ka kam ka bym don jingiadei bad ka kam jngohkai, ka dei kaba khmih da ka Tnad Transport bad kano kano ka rai ba shim halor kane, ka dei kaba lah ban shim da ka Kynhun Myntri” ula ong.
Ha ka 25 tarik Risaw, ka MTDF ha ka dorkhas bala aiti sha ka Tnad Tourism kala pynpaw ia ka jingdonkam ba ka Sorkar Jylla kanw anrah noh da ka policy ban kyntiew ia ki kam jngohkai ha Jylla haba kyrpad ruh ban mynjur ha kaban wanrah ia ka High Speed Luxury Rail Network ban pynduna ia ka por leit por wan na Guwahati sha Shillong.
Hynrei ka KSU kala pyrshah jur ia kane ka jingai jingmut jong ka MTDF bad iai ba ia ka jingdawa ban pynsangeh shuwa ia ka jingtyrwa ban wanrah lynti rel tad haduh bala pyntreikam ia ki ain pyrrkhing mynder kum ka Inner Line Permit (ILP) ha ka Jylla.
“Ngi kyntu ia ka Sorkar Jylla bad ka MTDF ban sangeh shuwa ka jingphohsniew ia ka High Speed Luxury Rail Network bad ha ka jaka jongka, pynbor shuwa ia ka Sorkar India ban pyntreikam noh mardor ia ka ILP ha Meghalaya bad ban wad ia ki lad ki lynti ha kaban wanrah ia ka roi ka par ha baroh ki liang sha ki paidbah bad ka Jylla” ong u General Secretary ka KSU samla Donald V Thabah ha ka kyrwoh.
