Shillong, July 22: Ka Federation of Khasi Jaintia and Garo People (FKJGP) hynne ka sngi, kala dawa naka Sorkar Jylla ban pyntreikam noh daka ‘Road Delivery Challan’ ban pyllait iaki kali kit mar rep, naka jingshah khrong pisa beain.
Hashuwa kane, ka FKJGP kala synran iaki nongrep ban kynduh iaka Myntri ka tnat ka rep ka riang Kong Ampareen Lyngdoh ban iakren halor ki bha ka miat ki nongrep bad ki nongkhaii mar rep sha kylleng ka thain Shathei Lam Mihngi (North East).
Haba kren sha ki lad pathai khubor, u President ka FKJGP Bah Dundee Khongsit ula iathuh ba ki don katto katne ki briew kiba lum khajna naki kali kit mar rep, ha kylleng ka surokbah ka Jylla (National Highway).
U Bah Dundee ula iathuh ba don ki kali mar rep, kiba shah pan pisa hapdeng T.500 haduh T.1500 shi kali.
Ula iathuh ba ki don ki riew shim kabu, kiba bat iaki kali kit mar rep bad dawa siew pisa bad kine ki briew kila bat ia ki kali da ki bun bun kynta, bad ka pynslem iaki kali ban poi sha ki iew ki hat bad haka juh ka por, ka don ruh ba ki mar rep, ki kylla pyut noh.
“Haka jingialang, ngi la kyntu iaka Myntri ban pyntreikam noh daka ‘Road Delivery Challan’ khnang ba ki kali kit mar rep, kin pyndonkam ia kine ki Challan ban lait naka jingshah khrong pisa beain” ong u Bah Dundee.
U Bah Dundee ula ong ruh baka jingioh jingithuh ki ‘Road Delivery Challan’ naka Sorkar kan iarap iaka tnat ban tip, iaka jingdon ki Nongrep, ki mar rep ba pynmih ha Jylla bad kumjuh ruh ia ka jingdon ki marrep ba khaii shabar ka Jylla khamtam nangne na Rilum Khasi-Jaintia.
U iathuh ruh ba haka jingialang, ka FKJGP lem bad ki Nongrep, kila kyntu iaka Myntri ban maramot iaki surok haki thain Lumshnong East Jaintia Hills khnang ban suk ka khaii mar rep shaki katei ka thain bad sha ka Jylla Assam.
.){kind=link}