Shillong, Jylliew 04 : U Myntri Rangbah ka Jylla Conrad K Sangma ha ka sngi Balang, ula ong ba ka Sorkar kan nym shongthait haduh ban da ioh kem ia kito kiba don bynta ha lyndet ka jingpyniap ia u nong Indore Raja Raghuvanshi, ka met kaba la lap na riat hajan ka kshaid Weisawdong hadien ka jingjah rngai bad ka Kurim ba wan leh honeymoon sha Sohra.
“Ngin ym shongthait bad ngin leh ia kat kaba donkam ban leh ban lap ia ka jingshisha bad ban pynthikna ruh ba ki briew kiba don bynta ha kane ka kam, ki dei ban shah kem bad ngat ia ka jingpynsajia” ong u Conrad haba iakren bad ki nongthoh khubor.
Halor ka jingdawa ki bahaiing ban tohkit CBI ia kane ka jingjia, u Myntri Rangbah ula ong ba ka Sorkar kan sa shim ia ka rai kaba donkam.
“Ka long kaba kongsan ban lap shuwa ia ka jingshisha. Ka long kongsan bha bad ka jingshisha ka dei ban mih. Kumta, kiei ki sienjam ba hap ban shim kat kum ka jinglong jingman, ngin sa shim ia ka rai ynda la dei kata ka por. Ia mynta, ka dang kloi palat ban ong ia kaei kaba jia bad haduh katno ngi tip bad haduh katno ngim tip namar ki don shibun kiei kiei ki bym pat lah ban pyniasoh bad ki daw kat haduh mynta katba ngi dang iakren hangne” ula bynrap.
U Myntri Rangbah ula kular ruh ia ki bahaiing hasem jong kine ki shijur na Indore ba ka Sorkar kala pyrshang ruh ban pynkloi kat kaba lah ha kaban wad haban da shen ia ka kurim jong une uba iap, kaba dang jah rngai mynta.
Haba niew ia kane ka jingjia kum ka jingjia kaba sngewsih haduh katta katta, u Conrad ula ong ruh ba ka dei ka kam kaba ym pat ju don mano mano ruh ban iohi ba kan jia ha Meghalaya.
“Kaei kaba jia kala pynkyndit ia ngi baroh bad baroh ngi shu shaiong. Wat ki trai shnong ruh kila kyndit, ki kynhun ba pyniaid ia ki kam jngohkai ruh kila kyndit bha ia kaei kaba jia bad ki dap da ka jingsngewkhia. Ka dei ka kam kaba ngim ju poi pyrkhat satia ba kan wan jia” ula ong.
Haba pynpaw ba ka Meghalaya ka dei ka jaka kaba burom bha ia ki nongwankai, u Conrad ula ong “Ngi ju pynthikna beit ia ka jingshngain jong ki nongwan shangkai. Ha kine ki snem bala leit noh, da ki lak ngut ki nongshangkai kila wan sha kane ka Jylla jong ngi. Kane ka jingjia ia ki nong Indore ka dei ka bym pat ju jia satia hangne”.
Haba pynpaw ia ka jingsngewlem bad jingburom ia ki bahaiing hasem, u Conrad ula ong “Nga tip ka dei ka jing duh kaba khraw ia ki hynrei nga kwah ban pynthikna ia ki bahaiing hasem ba ngi la trei khlem shongthait ban pynthikna ba ngim lap ia ki jingshisha bad tip ruh ia kaei kaba jia”.
“Ia mynta hi ngim pat iashai ia kaei kaba jia, kumno ka jia, ngi dang iawad ia ka kurim ba dang jah” ula bynrap.
