Shillong, Jylliew 03 : Ki bahaiing hasem jong ki shikurim na Indore, ha ka sngi Ba-ar, kila dawa ban phah tohkit ha ka Central Bureau of Investigation (CBI) halor ka jingiap u Raja Raghuvanshi, ka met bala kem pyut bala ioh tam na ka riat bah ha kshaid Weisawdong hadien ba ula jah rngai bad la ka kurim ha ka thain Sohra.
“Ngi dawa jur ban tohkit da ka CBI ia kane ka jingjia” ong u Vipin, uba dei u hynmen jong u (L) Raja Raghuvanshi, haba iakren bad ki nongthoh khubor ha NEIGRIHMS.
“Kane ka long namar ba ki Pulit ka Jylla im mynjur satia ba ka don ka jingleh sniew hynrei lada kam don ka jingleh sniew balei pat ba lap ia ka metiap?. Ia ka met u Raja la lap 25 kilometer na ka jaka ba pynieng ia ka scooty ba u shim wai. Kumta, ngi suba jur ba ka don ka jingrahbor (ba ialam ia ki sha kshaid Weisawdong)” ula ong haba ap ia ka jingleh post mortem ba kan dep hashuwa ban rah noh ia ka metiap jong la u para sha Indore.
U Vipin ula ong ruh ba kam lah ban long ba u para jong u bad ka kurim kin ianohiap hi namar ka jaka-kaba lap ia ka metiap jong u, ka dei kaba don ia ka jingker kaba biang.
Hynrei ula ong ba ki Pulit kim mynjur satia ia ka jingkynnoh ki bahaiing ba ka dei ka kam rahbor, lute bad pyniap.
“Baroh arngut ki iadeng ksiar. Artylli ki sati ksiar, u kynjri ksiar, u jingdeng ksiar, ka pla pisa, ki mobile phone ruh kila jah na ka met u Raja. Lada dei ka jingnohiap hi, baroh kine ki mar kin ym jah satia” ong une u Hynmen.
Ki bahaiing kila ujor ia ka jingjah rngai kine ki shikurim ha ka 23 tarik u Jymmang.
U Vipin ula kyntu ia ki bor ka Sorkar ba kin pynthikna ha kaban wad ban wan ialam im ia ka hepkynsi Sonam Raghuvanshi.
Haba kylli, ula ong “Kam don satia kano kano ka jingiakynad hapdeng jong ki. Ki dang shu iathoh ha ka 11 tarik Jymmang bad ki iakmen bha baroh arngut”.
 halor ka jingiap u Raja Raghuvanshi, ka met bala kem pyut bala ioh tam na ka riat bah ha kshaid Weisawdong hadien ba ula jah rngai bad la ka kurim ha ka thain Sohra.){kind=link}