Shillong, Naitung 09 : U Symbud Myntri Rangbah bad Chairman ka Regional Committee ka West Jaintia Hills Bah Sniawbhalang Dhar ha ka sngi Balang, ula pyntip ba shen un sa iakren bad u Chairman ka Assam Regional Committee ban pynbeit noh ia ka jingiakynad ba dang shen ha Lapangap, kaba hap hapoh ka jaka iakajia ha Khanduli-Psiar Sectior, katba ki Jylla ki dang iawad ia ka lynti ban pynkut noh ia ka jingiakajia pud.
“Ngan sa kren ia u Chairman ka Regional Committee na Assam bad ngin sa shim ia ka rai ban pynthikna ba kiei kiei baroh kin long biang kumba ju long katba ngi dang ap ia ka jingiapynbeit pud kaba shirta hapdeng ki arjylla” ong u Bah Sniawbha haba iakren bad ki nongthoh khubor.
Haba pynpaw ba ka jingiakren pynbeit pud jong ka wad kaba ar ka dang iaid, u Symbud Myntri Rangbah ula ong katba ym pat lah ban pynbeit ia ka jingiakajia pud, kane ka thain ka nym kut ha ka jingiakynad.
“Ynda ki (Assa Regional Committee) la long kiba kloi, ngin sa iakren ha kano kano ka por” ula bynrap.
Kat kum ka jingong jong u, ka Khanduli-Psiar bad ka Block-I ki dei napdeng ki 6 tylli ki jaka ba don jingiakajia ki ban dang iapynbeit.
U Symbud Myntri Rangbah ula kular ba ka Sorkar kala shimkhia bha ban iapynbeit noh ia ka kam iakajia pud. Hynrei, kan shim katto katne por naba ka dei ka kam kaba la sahteng la slem bha.
Haba kylli, u Bah Sniawbha ula iathuh ba u Deputy Commissioner ka West Jaintia Hills ula dep aiti ia ka kaiphod jong ka Regional Committee.
“Ia ka kaiphod jong ka Regional Committee yn sa aiti sha ka Sorkar Jylla hadien ba ngi la dep iashong jingialang na baroh arliang” ula bynrap.
U Bah Sniawbha ula leit iuhkjat ha Lapangap, kaba hap ruh hapoh ka Nartiang Constituency kaba u mihkhmat, ban peitthuh ia ka jinglong jingman bad kular ia ki nongshongshnong ba ka Sorkar kan sa phah bun ki Pulit na ka bynta ban ai jingiada ia ki.
“Ngi kwah ba kam dei shuh ban don kino kino ki jingjia. Ia mynta, ka jinglong jingman kala jai jai” ula ong haba pyntip ba halor ka jingkyrpad ki nongshongshnong, ka Sorkar kala phah bun ki Pulit ban pynthikna ia ka jingshngain hapoh ka thain.
