Imphal, Risaw 10: U Myntri Rangbah ka Jylla Conrad K Sangma ula wer ban long jai jai noh hadien ka jingia umsnam kaba jur ha khappud ka Assam-Meghalaya ha Lapangap, kaba la shim ia kawei ka mynsiem briew.
U Conrad ula buh ia kane ka jingkyntu lyngba ki lad pathai khubor ha ka jingiakynduh bad u ha Imphal hynne ka sngi Thohdieng.
Haba pynshai ia kaei kaba la jia, u Conrad ula ong ba ka jingia umnam kala mih na ka jingiakynad hapdeng ki arkynhun ki nongshongshnong na baroh arliang khappud jong ki ar jylla.
“Ka jingkulmar kala heh bha hapdeng ki nongshongshnong. Ki Pulit na baroh artylli ki Jylla kila iadonlang ha katei ka jaka bad kila pyrshang ban tehlakam iala ki briew. Kam shym la don satia ka jingiadon bynta lang ki Pulit ha kane ka jingkulmar bad kim shym la shim ia ka lynti ban bom ban tied iano iano ruh” ula ong.
U Myntri Rangbah ula pynpaw ia ka jingsngewsih halor ka jingkhlad noh uwei u briew bad ban jur ia ka jingdonkam ban pynbteng ia ka jingia imlang hapdeng ka jingsuk namar baroh artylli ki Jylla-Assam bad Meghalaya ki dang don hapdeng ka jingiakren ban pynkut noh ia ka jingiakajia pud bala neh da ki phew snem.
“Kum kine ki jingjia ki long kiba sngewsih, khamtam ha ka por ba baroh artylli ki Sorkar ki dang pyrshang khlem shong thait ha ka ban wad iaki lad ki lynti ban iapynbeit ia u pud u sam ba shirta” ong u Conrad.
Haba pyntip ia ka jingiaid shakhmat ki kam iakren khappud, u Conrad ula iathuh ba hynriew tylli na ki 12 tylli ki jaka ba iakajia hapdeng ki ar jylla ki dei kiba la dep ban iapynbeit lyngba ka jingiakren bad ka jingiasyllok ia ki paidbah-u mawmer ha ka histori ka thain.
“Ngi khlem iashim ia ka rai ha ki saw kynroh. Ngi la leit sha ki paidbah, pynlong ia ki public hearing bad kylli na ki shano ba ki sngew dei ban don-bad ka Meghalaya lane ka Assam. Ka sur jong ki ka ialam lynti ia ngi” ula batai.
U Conrad ula pynskhem biang ia ka jingkut jingmut ha ka jingiakren ha ryngkat bad u Myntri Rangbah ka Assam Dr Himanta Biswa Sarma, hapoh ka jingbtin lynti jong ka Sorkar Pdeng.
“Ngi baroh arngut ngi la mynjur ba ka jingialang kan long tang lada ngi lah ban jam shajan sha ki lad iapynbeit kiba don jngmut bad kiba lah ban pyndep pura. Ka status quo kaba rim kala don shadien mynta” ula ban jur.
Haba kyntu ban long jai jai, u Myntri Rangbah ula kyntu ia ki nongshongshnong na baroh arliang ba kin kiar na ka jingia umsnam bad ailad ba kan bteng ka jingpyrshang ban wanrah ia ka jingsuk. “Ngi la kut jingmut hok ban pynbeit noh ia ka jingiakajia pud ha ki hynriew tylli ki jaka ba dang sah lyngba ka jingiakren, ka jingshaniah bad ka jingiatreilang” ula ong.
