Shillong, Rymphang 19 : Ka Iingkashari Meghalaya High Court kan pynlong ia ka jingbishar kaba bniah bha halor ka kaiphod ka Sorkar halor ka jingbthei ka par tih dewiong ha Mynsngat-Thangsko, kaba la shim ia ka jingim ki 33 ngut ki nongbylla, hashuwa ba kan pynmih ia ki jingbthah.
“Ha ka jingpeit ka pyni ba ka kaiphod ka long kaba bniah bha bad ka donkam ia ka jingbishar man ka kyntien da kane ka Iingkashari, hashuwa ba kan pynmih ia kano kano ka hukum ba donkam” ong ka Division Bench ba kynthup ia u Justice HS Thangkhiew bad Justice W Diengdoh ha ka hukum ba pynmih ha ka sngi Palei.
Ka Iingkashari kala buh bang ia kane ka IPL ban bishar shuh shuh ha ka 24 tarik Rymphang bad bthah ia u Superintendent of Police ba mynta ka East Jaintia Hills, Pankaj Rasgania bad u SP barim Vikash Kumar ba kin wan mih hi dalade ha Iingkashari.
