Shillong, Rymphang 06 : Phra ngut ki nongbylla kila poi sha ki 2 tylli ki hospital Shillong, hadien ka jinging ding ka met ka phad, hadien ka jingbthei bomb dynamite ha ka jingtih dewiong hapoh ka par ba tih beain, ha East Jaintia Hills ha ka sngi Palei.
Kine kiba mynsaw kiba la pdung ding jur bha ka met ka phad ki kynthup ia u Shanki Shylla, Deb Malakar, Korna, Bom Magar, Lalit Magar, Jamil Ahmed, bad Nor Bahadur.
Hynniew ngut na ki la sumar ha North Eastern Indira Gandhi Regional Institute of Health and Medical Sciences (NEIGRIHMS), uwei ha Nazareth Hospital, Shillong, iathuh ki bor Sorkar ha ka sngi Thohdieng.
Kane ka jingbthei bomb kala wanrah ia ka jingiap haduh 18 ngut ki briew bad ka jingwad ia ki briew ba dang jah ka dang iaid shakhmat.
Ki kynhun ai jingiarap ki kynthup ia 3 kynhun na ka NDRF, 2 kynhun na ka SDRF, kawei ka kyndon SRT nalor ka kynhun ki doktor bad ki kali ambulance nalor ki BSF.
Ka jingiawad briew kala sdang naduh ka por 9:55 baje mynstep ha ka 6 tarik Rymphang bad haduh mynta ka dang iaid shakhmat.
