Shillong, Nohprah 11 : Tip jia aiu hapoh ka Regional Democratic Alliance (RDA)?, ka United Democratic Party (UDP) bad ka Hill State People’s Democratic Party (HSPDP) hadien bun bun snem, ha ka sngi Balang kila rai ban nym iatreilang shuh ha ka elekshon Autonomous District Council (ADC) ha Ri-lum Khasi bad Jaintia Hills.
Ia kane ka rai la shim ha ka jingialang jong ka RDA ba la pyniaid da u President ka UDP Bah Metbah Lyngdoh ha ka jingia donlang u President ka HSPDP Bah KP Pangniang nalor ki nongialam na baroh artylli ki party.
Haba kren sha ki lad pathai khubor hadien ka jingialang, u Bah Mertbah ula ong “Ngi la rai mynta ka sngi ba haba iadei bad ka elekshon ADC banwan…ngi la rai ba ka UDP kan iakhun la ka jong bad ka HSPDP ruh kan iakhun la ka jong”.
Ula ong ba ia kane ka rai la pynshong nongrim na ki jingshem ha ki snem bala leit noh bad ka jingdonkam ban burom ia ka jingsngew jong ki nongtrei ka party ha ki constituency bapher bapher.
U Bah Metbah ula pyntip ruh ba ki artylli ki seng riewlum kin iai bteng ban iatreilang pat ha ka lama jong ka RDA.
“Kum ka RDA, ngi (UDP-HSPDP) la kular ban bteng ia ka jingiatreilang” ula ong haba pynkynmaw ba ka “RDA ka dei kaba la thaw ym tang na ka bynta ka jingiakhun elekshon hynrei ruh naka bynta ban shim ia ki ishu bapher bapher kum ka Inner Line Permit (ILP), pynrung ia ka ktien Khasi bad Garo ha ka khyrnit ba phra ka riti synshar ka ri, ka jingpynbeit ia u pud u sam bad kiwei kiwei ki ishu kiba ktah ia u paidbah bad ia ka Jylla” ula ong.
“Kumta, (ka rai mynta ka sngi ban nym iatreilang ha ka elekshon) kam mut ba ka RDA kam don shuh. Nga kwah ban kren jam bad shai biang bad kwah ruh ban iai ban ba, ka RDA ka dang skhem bad kan dang bteng ban iatreilang hadie kane ka elekshon ruh” ula bynrap.
Haba kylli, une u President ka UDP ula onng ba baroh artylli ki party ki long laitluid ban pynieng ia kino kino ki kyrtong na kano kano ka constituency ba ki kwah.
