Sei lut ki paidbah ia ka jingbitar ha ka CM-Connect ia jingsuki treikam ki Tnad
Shillong, Nailar 08: Kawei ka Longkmie kala iam bad jaw ummat hakhmat u Myntri Rangbah ka Jylla Conrad K Sangma hynne ka sngi Palei ha ka prokram CM-Connect, namar ka jingsniew palat ka surok hapoh ka shnong jong ka, kaba hap hapoh ka Laskein Block, West Jaintia Hills.
Kane ka Longkmie ba na ka shnong Umsaliat kala pyntip ia ka jingsniew bad jingkhohruh khohram jong ka surok hapoh ka shnong jong ka, naduh ka por ba ka dang khynnah.
“Kum ka khynnah, nga la iohi ka surok na ka shnong jong nga sha Iooksi kaba la shu sahteng khlem dep. Man ki elekshon, ki kyrtong ki ju kular ba lada ki shah jied, kin sa pyndep noh ia ka surok. Hynrei, kala shu kut tang ha ka jingkular ha kine ki 20 snem bala leit” ong kane ka Longkmie.
U Myntri Sorkar Bah Comingone Ymbon, uba mihkhmat ia ka thain, ula ai jubab da kaba ong ba kane ka jingkular ka dei kaba la urlong mynta namar ia kane ka surok la dei ban mang pisa bad ka jingshna kan sa sdang noh shen.
Ka surok Umsaliat sha Iooksi ka dei kaba jngai kumba 2.5 kilometer. Haduh 40 ngut ki briew kila pynpaw iala ki jong ki jing sngewkhia ha kane ka prokram.
Ha kane ka CM-Connect, ki Nongialam Shnong, ki Rangbah Shnong bad ki paidbah kila shim ia ka kabu ban kren beit beit sha u Myntri Rangbah ka Jylla ban pan ia ka jingpynshai jong u halor ki kam bapher bapher. La iohi ruh ba bun kila pyni ia ka jingbitar pyrshah ia ka jingiaid suki ki kam, ka jingpyntrei torti bad pynslem ban pyllait ia ki skhim.
U Myntri Rangbah ula sngap bha ia kine ki jingpynpaw bad ula ai jubab bad jingpynshai ia ki jingsngew artatien haba kular ruh ba ka Sorkar kan sa leh eiei ia ki jingeh kaba ki pynpaw.
Ka kam kaba la pynpaw hakhmat eh ka dei eh halor ka jingbym biang ki lad pyniasoh ne jingsniew ki surok, ka jingduna ki iingskul ha ki shnong, ka jingbym biang ki jaka ai jingsumar, ka jingbym biang ha ka jingsam jingbam tei met ia ki khynnah, ka jingeh ba iadei bad ka jingpyntreikam ia ka JJM bad kiwei kiwei.
Haba jubab ia kine ki jingpynsngew u paidbah, u Myntri Rangbah ula ong ba ka Sorkar kala kyntiew kyrdan ia ki jingtei jong ki Iingskul ha kylleng ka Jylla bad ia ki skul na Laskein Block, yn sa shimkhia mardor da ka Sorkar.
Halor ka jingkyntiew kyrdan ia ki jaka ai jingsumar, u Myntri Rangbah ula ong ba ka Sorkar kala kyntiew kyrdan ia ki PHC sha ki CHC hapoh ka Health Infrastructure Strengthening Project. U pyntip ba na Laskein Block ruh, ka Tnad kan sa ithuh ia ki jaka sumar ba dei ban kyntiew kyrdan.
U Myntri Rangbah ula pyntip “Ka jingthmu jong ka CM-Connect ka long ban sngap ia ki paidbah jong ngi. Kane ka dei ka prokram, kaba ngin lah ban top ia ka jingdonkam ki briew jong ngi bad ban shim rai kat kum ka jingdonkam u paidbah”.
“Haduh 1600 tylli ki Shnong ha Meghalaya ki dei kiba la iasoh surok. Kine ki surok kim lah ban bei tyngka da ka Sorkar Pdeng hapoh ka National Highway, PMGSY lane Stste scheme namar kim iahap kat kum ki kyndon bala buh. Ka Sorkar jong ngi kala pyllait ia ka Chief Minister Rural Road Connectivity Scheme, ban pynthikna ba kum kine ki surok ki bym ioh ia kano kano ka skhim, kin ioh ia ka pisa ban pyntrei. Ngi la dep ithuh ia bun tylli ki surok bad ngi la lum thup ia ki surok thymmai ha ki jaka nongkyndong ban ai na kane ka skhim” ula bynrap.
Kiba bun kila pynpaw ruh ia ka jingdonkam ban don ki jingtei kum ki madan phutbol, police outpost khamtam ha ki jaka khappud, ki transformer, ki ophis jong ki Village Organisation, ki jingdonkam ia ki centre ialeh eksam SSLC, ki Bank, ka iew ki nongrep bad kiwei kiwei.
