Shillong Nohprah 10:– Ka Martin Luther Christian University kala lah ban pynmih pisa haduh T.1,87,530 lyngba ka Fete bad ia kane ka pisa yn sam sha ki lanot ha ka jylla Manipur.
Ka MLCU kala pynlong ia ka Fete ha ka 2 tarik u Nohprah da ka jingthmu ban pynmih pisa bad ia katei ka pisa kaba ioh lum yn sam sha ki riewshimet kiba sah ha ki jaka riehtngen ne Relief Camp kiba don ha ka jylla Manipur.
Nalor katei ka pisa ka MLCU, kan sam ruh ia ki jaiñ syaid, ki tiar ki tar ïing na ka bynta ki 24 tylli ki longïing, 100 tylli ki brut shut bniat & Toothpaste, 100 tylli ki sabon sum, 50 tylli ki kot dro dur bad ki let rong, 400 tylli ki sabon siat jingkhlieng, 30 song ki mit-mit bad kiwei kiwei ki tiar donkam bad ki marbam.
Ka MLCU kan sam ruh ia ki 200 tylli ki nep kiba dei kiba la noh synniang bad kiba la pynmih pisa hi bad ia kitei ki mar bad ki tiar ki tar la pynkit ban pynpoi sha ki lanot khnang ba kin ioh pyndonkam ha kane ka aiom tlang.
La khmih lynti ba kitei ki tiar kila poi ha ka 8 tarik u Nohprah bad yn sam sha ki lanot kiba sah ha ki Relief Camp da ka jingiatreilang bad ki bor kiba dei khmih.
