Shillong Rymphang 16: Ka Sorkar Jylla kala jam shakhmat ban pyndep noh ia ka jingthungkam ha ki 3000 tylli ki kam kiba lait ha ka tnad pulit.
“Ngi shim ia ka jingkitkhlieh ban pynkhlain ia ka tnad pulit, ka jingpynrung kam jan kumba 3000 tylli ki kam kiba lait kadei kaba lah jan pyndep” la ong u Lat ka Jylla u CH Vijayashankar haba ai jingkren ha ka sngi sdang jong ka Dorbar Mang Tyngka hynne ka sngi Nyngkong.
“Ka jingthmu kaba hakhmat jong ka sorkar ka long ban kyntiew ia ka jingsuk, jingshngain bad ia ka bha ka miat jong ki nongshong shnong. Ha u snem ba la dep, ka jinglong jingman ha ka jylla kala long kaba shongsuk shongsain, la ong u Lat bad ka bynrap ba baroh ki tamasa kynthup ia ki jingrakhe hapoh ka ri bad ki jingrakhe ha ka jylla kidei kiba la iaid beit da ka jingsuk.
U Vijayashankar ula ong, ba ka jingpynbiang ia ka jaka sah ki pulit kadei kaba la pyniaid shakhmat. “Ngi kut jingmut ban pynkhlain ia ka tnad pulit ka jong ngi, ka jingpynrung kam ia jan kumba 3000 tylli ki kam kiba lait kadei kaba lah jan dep artad” ula ong.
Ha u snem ba la dep, u Lat ula ong, ba bun ki jingtyrwa ban pynkhlain ia ki jingtei jong ki pulit kidei kiba la shimkhia hapoh jong ka Police Infrastructure Renovation Fund.
Ka jingtei ia ki 14 tylli ki Police Housing Project kala iaid beit bad kane kan pynkhlain ia ka jingai jingshakri jong ki pulit ha kylleng jong ka jylla, ula bynrap.
