Shillong, Nailar 10: Lait noh 1-2 ngt hynrei baroh ki Principal, ki nonghikai, ki samla pule bad ki college hapoh ka jylla kila mynjur ban pyntreikam noh iaka National Education Policy (NEP) naduh mynta u snem.
Ia kane la kam da u vice chancellor (VC) ka skulbah North Eastern Hills University (NEHU) Prof. Prabha Shankar Shukla uba la kam ba ka jingpyntreikam iaka NEP kan wanrah ia ka jingmyntoi iaki khun samla ka jylla Meghalaya.
“Haduh mynta ngam pat ioj jingthoh naka Principal jong ki College ba ki pyrshah ban pyntreikam iaka NEP naduh mynta u snem hynrei ki don 1-2 ngut ki ba pynpaw ba kim sngewiahap ban pyntreikam iaka NEP” kam u Prof. Prabha Shankar Shukla.
U Prof. Prabha Shankar Shukla ula ong ba kum u VC ka NEHU um don bor ban khot iaki nongialam ka MCTA ban iakren halor ka jingpyrshah jong ki ban pyntreikam iaka NEP bad naka liang ka MCTA ruh kam don bor ban pyrshah iaki College ban pyntreikam iaka NEP.
Ula ong ba kum u u VC ka NEHU ula lum shi bun ki jingialang bad ki Principal jong ki College, ki nonghikai, ki samla pule bad ki sengbhalang hynrei haduh mynta ka MCTA kam shym la wan shakhmat ban iakren halor ka jingpyrshah ka jong ki ban pyntreikam iaka NEP.
“Nga kloi ban iakren bad ka MCTA lada ki wan shakhmat hynrei haduh mynta kim shym la wan shakhmat hynrei dei tang ki Principal, ki nongialam ki sengbhalang ba kynthup ka KSU, HYC, FKJGP bad ki samla pule ka NEHU kila wan ban iakren bad nga bad baroh kila ia mynjur ban iaid beit iaka jingpyntreikam iaka NEP naduh mynta u snem” ula ong.
U VC ula ong ba ka NEHU ka kloi ban iarap iaki College ban pyntreikam noh iaka NEP naduh mynta u snem 2023 namar kane kan wanrah ka jingbha bad ka jingmyntoi iaki khun samla ka Meghalaya bad dei namar kane baroh kila mynjur iaka NEP.
