Shillong, Iaiong 06: Ka Maitshaphrang Khasi League Basketball Tournament kaba la pynlong da ka Khasi Students Union, Mawlai Circle ha Madan Basketball, Mawlai Nongpdeng kala nang iaid shakhmat bad hynne ka sngi Saitjaiñ kila don 7 tylli ki jingiakhun ha katei ka lympung iakob ialehkai Basketball.
Ha ka liang ki shynrang kila don 6 tylli ki jingiakhun, katba ha ka liang ki kynthei kala don tang kawei ka jingiakhun.
Ha ka jingiakhun ha ka liang ki shynrang ka long hapdeng ka Dubakh G pyrshah ia ka Eagle Elite ha kaba ka Eagle Elite kala pynrem iaka Dubakh da 33 la 6 bad u Damebabitbor Chyne jong ka Eagle Elite ula ioh ia ka nam Player of the Match.
Ka Ri Ar Promoters kala pynliem ia ka Youngbloods da 42 la 19 bad u Jeff Syiem ula ioh ia ka nam Player of the Match.
Ka P.A.T.M kala pynrem ia ka Dubakh C da 48 la 43 bad ia ka nam Player of the Match la ioh da u Gilbert Kharkangor jongka P.A.T.M.
Ka Shipara kala pynliem ia ka Black Diamond da 38 la 29, katba ka Iaineh A kala pynrem ia ka Lussco da 55 la 44 bad ia ka nam Player of the Match la ioh da u Lucky jong ka Iaineh.
Ka FKJGP kala pynliem ia ka Dubakh B da 46 la 33 bad u Iaishanlang ula ioh ia ka nam Player of the Match.
Katba ha ka jingiakhun ha ka liang ki Kynthei ka Touchline kala pynrem ia ka Dubakh D da 51 la 10 bad ia ka nam Player of the Match la ioh da ka Cheryl Blah jong ka Touchline.
Ia kane ka jingiakob ialehkai Basketball la sdang ha ka 4 tarik u Iaiong bad la plie ia ka, da u General Secretary ka KSU u samla Donald V Thabah kum u kongsan ha kaba kila don 42 tylli ki kynhun kiba la wan ban iashimbynta kiba kynthup ia ki 30 tylli ki kynhun ha ka liang ki shynrang bad 12 tylli ki kynhun ha ka liang ki kynthei.
