Shillong, Nailur 6 : Ka Woodland Hospital ha ka sien kaba nyngkong eh ka la lah ban pyndep ia ka jingkylliang ia ka plasma ha ka met jong ka nongpang ba 39 snem ka rta.
Katei ka jingkylliang ia ka plasma kadei ka bynta ka jingkylliang ia ka snam kaba iapher na ka dialysis. Kadei ruh ka bynta kaba hap ban leh da kaba pyndonkam da ki kynja jingjiar kiba kyrpang bha ha ka met u nongpang kaba la pyniasoh bad ka mashin kaba long kum ka mashin dialysis hi, ong ka Dr. Indakiew Kharbuli ba dei ka Consultant Nephrologist jong ka Woodland Hospital, Shillong.
Ka Dr. Kharbuli ka ong ruh ba katei ka jingkylliang ia ka plasma kadei ka kam kaba suk kaba shim por tang kumba 20 minit ei ei. La ong ruh ba katei ka jingkylliang ia ka plasma kadei tang ka jingkylliang noh ia ka plasma ka ba la sniew bad kylliang noh da kaba bha.
La iathuh ruh ba ki nongpang ba donkam ia ka plasma kidei kito ki nongpang ba don ia ka jingpang ba kham pher ne kiba don ki antibodies kum ka TTP (Thrombotic thrombocytopenic purpura), lane kino kino ki jingpang ba long anti-GBM.
Katkum ka jingiathuh jong ka, dei ha u bnai Jylliew mynta u snem ba ki la dep ban kylliang ia ka plasma kaba nyngkong eh ha ka met jong katei ka nongpang ba 39 snem ka rta.
La iathuh ruh ba katei ka nongpang hadien ba la dep pyni sha ki medical specialist la pyntip ba ka snam jong ka, ka don duna ka hemoglobin nalor ba ka don jingthut ha u khyllai.
La iathuh ruh ba hadien ba ladep ban pyntikna ba ka donkam ia ka TTP, ka Dr. Kharbuli ka ong ba mardor ki la sdang noh ia ka jingkylliang ia ka plasma bad hadien da kaba leh kumtei, katei ka longkmie ka la lait na ka jingma.
Ia katei ka nongpang la pyllait noh ha u Jylliew mynta u bnai hadien ka jingbthah ba kan bteng ia ka jingsumar hadien ar taiew la lap ba kala koit la khiah pura bad kam don shuh kano kano ruh ka jingujor.
Katkum ka jingiathuh da ka Dr. Kharbuli katei ka jingpang Acquired TTP kadei ka jingpang kaba shyrkhei bha bad lada ym sumar bha kumba 90 persen ki kynduh beit ia ki jingjia ba sngewsih haduh ka jingiap na ka daw ka jingphlei snam lane kiwei kiwei ki jingshitom. Watla katta ka la ong ruh ba katei ka rukom sumar kadei na ka bynta shipor bad ka jingbuddien ia ka nongpang pat ka long man ka por.
