Shillong, Nailur 25 : Ka jingiakhih jongka Federation of All School Teachers of Meghalaya (FASTOM) kala jam sha ka sngi kaba saw bad kala rai ban iai bteng ia ka jingiakhih da kaba shong kyllain mungor ne ka sit-in-demonstration kaba khlem buh por tad haduh ka rai jong ka sorkar jylla ban kyntiew kyrdan ia ki skul adhoc sha ka deficit.
Ia kane ka rai la shim hadien ba ka kynhun jongka Federation dang shen kala leit iakynduh ia u Myntri ka pule puthi u Bah Lahkmen Rymbui, uba la pynpaw ba ka sorkar jylla kan khmih bniah shuwa ia baroh ki jingai jingmut ha kaba iadei bad ka jingpynbeit ryntih ia ki kyrdan ki skul hapoh ka jylla hashwa ban shim ia ka rai.
Haba iakren bad ki nongpathai khubor, u Vice President ka FASTOM u Bah S Jungai ula ong ba ka jingtyrwa ia ka Meghalaya Education Grant (MEG) ka dang dei ha ka rynsan kaba dang lung bad ki nonghikai adhoc kam long kaba shai bha ban pyntreikam noh.
“Kum ki nonghikai adhoc, ngim tip bha la kin pyntreikam ne em ha ka sngi kaba kut. Kumta ngin ieng beit ha ka mat jingdawa kaba kongsan ka jong ngi bad kata kadei ban kyntiew kyrdan ia ki skul adhoc sha ka deficit” ula ong.
U Bah Jungai ula pynpaw ia ka jingbitar halor ka jingbym ioh ia ki jingpyntip kiba biang na ka sorkar jylla watla kila dep ban phah haduh hynriew sien sha ka ophis jong u Myntri Rangbah.
“Ngi ngin bteng bad ki jingdawa ki jong ngi tad ba u Myntri Rangbah un jubab ia ka jingdawa ka jong ngi” ula ong.
U Bah Jungai ula kdew ba bunsien la pynpaw ba dei namar ka jingeh ha kaba iadei bad ka pisa ka tyngka ba ym shim la lah ban shimkhia ia ka jingdawa ki nonghikai adhoc.
“Ngi tip shai kawei ka long ba lada ka sorkar ka don ia ka mon, ngam tharai ba kan don kano kano ka jingeh ha kaba iadei bad ka pisa ka tyngka” ula bynrap.
U Vice Presidentula ong ba ka Federation ka dawa ba dei ban ioh ia ka jingkular da ka jingthoh na ka sorkar jylla ba ki nonghikai adhoc kin ioh ia ka jingsiew kaba biang ne ka basic pay bad kiwei pat ki jingmyntoi ne Allowances.
Ha kaba iadei bad ka jingialang kaba dang shen bad u Myntri ka pule puthi u Bah Lahkmen Rymbui, uba la pynpaw ba ka sorkar kan pule bad khmih bniah ia baroh ki jingai jingmut bad ki jingpynsngew (na baroh kiba donbynta lang halor ka jingtyrwa ban pynbeit ryntih ia ki kyrdan jong ki skul) u Bah Jungai ula ong ba ka jingshisha ka long ba ki nonghikai Adhoc kim lah ban ap sah khlem buh por ia ka rai jongka sorkar.
“Kumta ngi kwah ia mynta ba ka sorkar jylla kan ai da ka jingthoh ia ka Federation ba kin ai da ka jingsiew kaba biang bad kiwei kiwei ki jingmyntoi. Kane kadei ka nongrim.kaba ngi ieng mynta” ula bynrap.
U nongialam ki nonghikai ula ong, ba ka kynhun kala kyrpad ia u Myntri ka Pule puthi bad ia u commissioner & secretary ban pynsngew sha u Myntri Rangbah ba ki nonghikai ki dang ap ia ka rai jongu”.
Ka jingioh tulop ki nonghikai adhoc mynta ka long T.18,000 ia ki lower primary, T.22,000 ia ki upper primary, T. 29,000 ia ka secondary, T.31,000 ia ki nonghikai science bad T.33,000 ia ki Higher Secondary.
 kala jam sha ka sngi kaba saw bad kala rai ban iai bteng ia ka jingiakhih da kaba shong kyllain mungor ne ka sit-in-demonstration kaba khlem buh por tad haduh ka rai jong ka sorkar jylla ban kyntiew kyrdan ia ki skul adhoc sha ka deficit.){kind=link}