Nongpoh, Jylliew 16: Uwei u rangbah naka shnong Ummar, Western Ri-Bhoi u la jah bad khlem wanphai iing shuh la kumba 5 sngi mynta, kaba la buh ruh ïaki bahaiing bad ki paidbah nongshong shnong hapdeng ka umdum namar kim don jingtip shano u leit bad u don.
Katkum ka jingïathuh jong ki bahaiing, utei u rangbah ba jahu dei bala tip kyrteng kum u Carlus Tron ba ju khot ieid ruh kum u Jack. Une u rangbah ula jah naduh ka 11 tarik mynta u bnai, ka sngi ba u la leit buh ïala ka lok kaba dang armet sha Ganesh Das Hospital, Shillong.
Ha katei ka sngi, namar ka jingbym ioh kali shuh ban wanphai, une u rangbah ula phone ïa u Bah Youngmind Makri u ba dei u Secretary Shnong ka Ummar ban phah wanshaw, hynrei namar ba um lait utei u Secretary Shnong, u la phone ban phah leit shaw da ki paralok, bad wanphai ryngkat bad la ka jong ka kiaw kurim.
Ynda poi ha Umran utei u rangbah u la phah sangeh syndet ïaka kali harud surok da haka por kumba 8 duna eiei da kaba ong ruh ba u kwah ban leit shabar, hynrei naduh katei ka por, utei u rangbah u khlem wanphai shuh, kaba la pynlyngngoh ruh ïaka kiaw kurim bad kitei ki paralok ba leit lang.
Kitei kiba don lang ha katei ka kali kila pyrshang ruh ban leit peit ha katei ka jaka ba u leit shabar hynrei ki khlem lapdien satia ha kaba kila leit ban pyntip noh mar mar sha ki pulit jong ka Umsning Police Station.
Naka liang ki bor shnong jong ka Ummar naduh katei ka sngi bad haduh mynta ka sngi kila mih paidbah ban leit wad ïa utei u rangbah ha katei ka jaka ba u jah hynrei ki khlem lapdien satia ha kaba kila kyrpad ruh ioh don kino kino kiba iohi ba kin pyntip sha ki pulit kiba hajan eh jong ki.
