Tura, Naitung 23: Iwei ka heprit ba dang 6 snem ka rta ila jah klep na ka shnong Rajasimla kaba don ha North Garo Hills naduh ka 18 tarik u Naitung bad ki paidbah kila ia mih ban wad ia ine i heprit ha kylleng ki jaka hynrei haduh mynta kim shym la lap satia ia i.
La pynjur ia ka jingwad ia ine i heprit bad la khmih bniah ruh ia ka da ka Meghalaya State Commission for Protection of Child Rights (MSCPCR).
Ia ine i heprit la iohi khatduh hajan ka iingsah ha ka por mynsngi. Naduh katei ka sngi ba i jah klep, ki nongshong shnong, ki pulit bad ki volunteer kila ia mih ban pynlong ia ka jingwad ia i ha ki khlaw ki btap kiba don ha Rajasimla bad Rangsa hynrei haduh mynta kim shim la lap ksai eiei ia i.
Ha ka 21 tarik u Naitung ka Chairperson jongka MSCPCR, Agatha Sangma, kala shimkhia ia kane ka jingjia bad kala bthah ia ki bor kiba dei khmih ba kin pynjur shuh shuh ia ka jingwad ia ine i heprit.
Ha ka sngi Balang, ka Agatha Sangma kala leit dalade sha Rajasimla ban khmih ia ka jinglong jingman bad ban pynthikna ba kan don ka jingpyrshang kaba borbah ban lap ia itei i heprit. Kala iakynduh ia ki bor pyniaid district, ka kynhun kaba leit wad bad ia ki bahaiing bahasem jong itei i khynnah ban ai ia ka jingkyrshan bad ban iatreilang nangne shakhmat.
La synran ia ka Agatha da u SP ka North Garo Hills Additional u Ravi K. Sangma, ka Investigating Officer ka Pinky bad DCPO u Salnam Momin, ka khlieh jongka MSCPCR kala khmih ia ka jingpynlong ia ka jingwad bad pynthikna ia ki bahaiing bahasem ba ka jylla ka ieng ryngkat lem bad ki ha kum kane ka khyllipmat.
Ryngkat bad ka Dog Squad, Fire & Emergency Services bad ka kynhun jongka CDPO kila pynlong ia ka jingwad ha kylleng ki jaka bad mynta kane ka jingwad kala nang jur bad kala iaid beit shakhmat.
Ka MSCPCR kala kyntu ia kino kino kiba don ia kino kino ki jingtip la ki long kiba rit ruh ba kin mih shakhmat mardor.
