Dibrugarh, Jylliew 19: Saw ngut ki briew kila jah rngai katba san ngut kila jngi bad lait im ha ba ka lieng ba ki shong, ka la kylla ha Wah Brahmaputra hapoh ka thaiñ Rohmoria, kaba don ha Chabua jong ka Dibrugarh hynne ka sngi U Blei.
Kat kum ka khubor, kane ka jngjia kala jia hapdeng jong ka Wah Brahmaputra bad kine ki briew kiba don 9 ngut, ki dei kiba dang wan na Mohmara da ka lieng ban leit sha Balijan.
San ngut napdeng jong ki, kila lah ban pyllait im ialade da ka ba jngi sha rud katba saw ngut pat kila jah rngai ia kaba la suba jur ba kila ngam jyllop bad shah rong ha ka wah.
“Kine ki briew kila wan na Phoolbagan Chapori sha Balijan Ghat ban die dud. Ki don khyndai ngut ha kane ka lieng ha kaba san ngut kila shu jngi ban lait im. Namar ka jingkhlaiñ bor jong ka wah, saw ngut kila jah rngai bad ngam jyllop” ong ki bor sorkar na Assam.
La pyntip ba ka kynhun jong ka NDRF bad ka SDRF kila sdang mynta ban iawad ia kine ki briew ryngkat ka jingsynran lang ki Pulit bad ki bor pyniaid District kiba la poi lang sha kane ka jaka.
Ha kajuh ka por, u Deputy Commissioner ka Dibrugarh u Biswajit Pegu ula hiar lang sha kane ka jaka ban peit thuh ia ka jinglong jingman ha kane ka jaka.
