Shillong, Jymmang 20 : U Myntri ki kam Jngohkai Bah Paul Lyngdoh ula pyntip bad ka Tnad Urban Affairs kala dei ban ithuh ia ka jaka shong dukan madan ha Khyndailad bad pyntip ruh ba ka Sorkar kala jan dep artad ban jied ia ki briew ba kin shong dukan ha ki 200 tylli ki jaka.
Haba iakren bad ki nongthoh khubor, u Bah Paul ula ong “Khlempep, ka long kaba eh ia ngi ban ai jaka shong madan ia baroh. Kumta ngi la jied ia ka jaka ha Khyndailad. Ngi la dep pynbeit ia ka kam ha kaba ka Tnad Urban Affairs kala jied ia ki briew ban ai jaka namar ki don tang kumba 200 tylli ki jaka”.
“Ngi lah ban ai jaka tang 200 ngut ki nongshong dukan madan katba kiba kam pat ki don bun bha. Hadien ba ngi la dep ia kane, ngin sa phaikhmat sha kiwei pat ki jaka” ula bynrap.
U Bah Paul ula iathuh “Ngi la dep mynta ban shna ia ki dukan na ka bynta ki nongshong dukan madan”.
