Shillong, Jylliew 12: U Myntri ka tnad Social Welfare u Bah Paul Lyngdoh, hynne ka sngi ula pyntip ba ka sorkar jylla kala ithuh haduh 7 tylli ki District kiba don ha ka thup Hotspot ne ki District ba jyllei tam u droks.
Haba iakren bad ki nongthoh khubor u Bah Paul Lyngdoh ula ong “Ki don ki district kiba ka jingdih bad jingdie ia u drug kala nang jur bha bad la ithuh ia ki 7 tylli ki District ha ka jylla kum ki Hotspot”.
Ula ong, ba ki 7 tylli ki District kiba la ithuh kum ki Hotspot ki kynthup ia ka East Khasi Hills, East Jaintia Hills, West Jaintia Hills, Ri Bhoi, West Garo Hills, West Khasi Hills bad South Garo Hills bad ula iathuh ruh ba la ithuh ruh ia ki shnong ki tahw kiba don ha kitei ki District kiba jur ka jingpyndonkam ia u Drug.
U Bah Paul ula iathuh ba hapoh East Khasi Hills, ki shnong ki thaw kiba jur ka jingpyndonkam ia u drug ki kynthup ia ka shnong Madanriting, Jhalupara, Laitumkhrah, Nongthymmai, Polo, Nongmynsong, Mawlai, Mawprem, Lumdiengjri, Iew Mawlong, Mawngap, Mawryngkneng bad Pynursla.
Ha ka jingialang kaba la lum da u Myntri Sorkar la wan ban iashimbynta da u Director General of Police (DGP) ka jylla, u Director ka tnad Social Welfare, ki heh ka tnad ka koit ka khiah, ki heh pulit bad kiwei kiwei.
Na ka liang jong ki heh pulit kila kdew ba kila don ki jingdkoh ha ka Narcotic Drugs and Psychotropic Substances Act (NDPS) 1985 bad ka long kaba donkam ban don ia ki Rule kiba la shna da ka sorkar jylla.
U Bah Paul ula pyntip ba ka sorkar jylla kala ai jingmynjur iaka draft policy jongka DREAM project- “Drug Reduction Elimination & Action Mission”.
Ula ong ba ka jingthmu jong ka DREAM project ka long ban trei na ka bynta ban pynlong iaka jylla Meghalaya kaba lait noh na u Drug bad lyngba katei ka mission, u Mission Director bad ka kynhun ka jongu kin iarap ia ka sorkar ha kaban iatreilang bad baroh ki tnad sorkar kiba iadonbynta bad katei ka ishu.
U Bah Paul Lyngdoh ula pyntip ba la mang ruh T. 5 Klur na ka bynta ban pynsaphriang ia ki khubor bad ki jingpynbna bad kumjuh ban pynlong ia ki awareness program lyngba ka DREAM mission.
