Tura, Nailur 25: U Mahasankar Majumdar uba dei u scientist jong ka Muga Eri Silkworm Seed Organisation (MESSO) ha ka Central Silk Board’s P4 Seed Station ha Mendipathar, North Garo Hills District jong ka Meghalaya, ula ioh iaka khusnam Best Scientist Awards.
U Majumdar ula ioh ia ka jingithuh halor ka jingnoh synniang kaba radbah jongu sha ka Muga Seed Sector naduh u snem 2019 haduh u 2023.
Ka Central Silk Board (CSB), kaba hap hapoh ka Ministry of Textiles, jong ka Sorkar India, kala ai jingithuh ia ki 15 ngut ki Scientist ha ki lai tylli ki bynta halor ka jingnoh synniang ba kyrpang ka jongki ha kaba iadei bad ka kam Sericulture. Kila ioh pdiang iaka ‘Best Scientist Awards’ kum shi bynta jong ka jingrakhe ia ka “National Silk Day” bad kum ka jingrakhe ia ka Platinum Jubilee jong ka Board ha ka 20 tarik Nailur 2024, ha ka jingialang kaba la long ha Mysore, Karnataka.
Ia kitei ki khusnam la ai sha ki Scientist ha ki bynta bapher bapher jong ka jingwad bniah, jingpynroi, jingpyniar bad ha kaba iadei bad ki bynta jongki symbai.
U Majumdar ula ioh pdiang ia katei ka khusnam ha ka jingdon lang u myntri ka sorkar pdeng uba khmih iaka tnad Textiles u Giriraj Singh, u myntri khynnah ka sorkar pdeng u Pabitra Margherita bad kiwei kiwei ki heh ki haiñ ha ka jingialang kaba la long ha Karnataka State Open University Convocation Hall ha Mysore.
U Majumdar ryngkat bad ka kynhun jongu, kila trei shitom ha kine ki 5 snem kiba la dep ban pynmih ïa ki symbai Muga kiba bha tam ha Mendipathar Unit da kaba ïoh palat 100% ka jingjop ha katei ka jingpynmih. Ka P4 Unit mynta ka pynleit jingmut ha kaban pynmih ia ki symbai Muga ha ki jaka kiba khriat kum ha Kalimpong bad Darjeeling ha West Bengal bad ban kyntiew ia ka jingpynmih ha ki jylla ka thain shatei lam mihngi, kumba la bthah da ka MESSO, Guwahati.
 ha ka Central Silk Board's P4 Seed Station ha Mendipathar, North Garo Hills District jong ka Meghalaya, ula ioh iaka khusnam Best Scientist Awards.){kind=link}