Delhi Jymmang 24: U samla Franklin Marwein bad ka samla Aidamon Talang
kila rah ia ka nam lahduh jong ka Mr bad Ms Hynniewtrep kaba la long hynne ka miet jong ka sngi Saitjain ha Meghalaya House, Dr APJ Abdul Kalam Road, Delhi.
Ia kane ka jingiakob thei bhabriew bad rangkynsai la pynlong da ka Khasi Students Union (KSU) Delhi Unit bad kila don 6 ngut ki samla shynrang kiba la iashimbynta ha kane ka jingiakhun bad 11 ngut ki samla kynthei kiba la pyni iala sap ka phong ban iohrah ia ka nam lahduh jong kane ka jingiakob.
Ki nongsiashimbynta kila iashimbynta ha ka Traditional Round, Casual Round bad kaba khatduh kadei ka jingshah buh jingkylli ha ki nongbishar jong kane ka jingiakob.
Ha ka liang ki shynrang u samla Franklin ula ioh ia ka nam Mr Hynniewtrep, katba u samla Poimi Pdang ula ioh ia ka First Runners Up bad u samla Ernie Kharchandy ula ioh ia ka Second Runners Up.
Ha ka liang ki kynthei ka Aidamon kala ioh rah ia ka nam lahduh, katba ka sala Gabriella Duia bad ka Enrica Ronghang kala ioh ia ka Second Runners Up.
Ha kane ka jingiakob la donlang u Symbud Myntri Rangbah ka jylla u Bah Prestone Tynsong, u MP ka Tura Parliamentary Constituency u Saleng Sangma, u President ka KSU u samla Lambokstarwell Marngar, u OSD bad Political Secretary jong u Myntri Rangbah ka Meghalaya u Bah Daniel Thangkhiew, u MLA ka Jowai u Bah Wailadmiki Shylla, ki nongialam ka KSU Delhi Unit bad ki Khasi kiba shong ba sah ha Delhi.
Haba kren ha ka jingialang u President ka KSU u samla Lambokstarwell Marngar ula ong “Nga sngewsarong ba ka KSU Delhi Unit ka pyni ba ka kolshor kala sdang ban suhthied hangne bad ka jaidbynriew kala sdang ban kiew ha baroh ki liang.
“Ngi la seng ia ka shnad treikam jong ka KSU kam dei tang ha Delhi hynrei ka don ruh ha Dehradun, Bangalore bad kylleng ki jylla ka thain shatei lam mihngi bad ka jingthmu ka seng ka long ban lum ban lang bad ban kyrshan bad iarap ia la ki paradoh parasnam” ong u President ka KSU bad ka kyntu ia ki kmie ki kpa ba kin ailem ia ka kti kamon kadiang ban kyrshan lem ia ki samla jongka KSU Delhi Unit ba kin lah ban trei bad ban ai ia ka jingshakri kaba kham bha ia ka jaidbynriew.
Ula pynpaw ruh ia ka jingsngewsih bad jingkthang ban iohi ba ki samla ka jaidbynriew kin shah pyndonkam bakla bad ban shah thombor ha kiwei kiweivhaba ki don shabar ka jylla.
“Ka jingiabishni bad jingpihuin, dei ban buh ne kyndat noh sharud, ngi sngewthuh ba ka KSU Delhi ka mad ia ka jingeh namar ki samla kiba bun ki don ha ka jingpule hynrei kila aiti bad pynlut ia la ka por bad ia ka bor ka jongki ban ai jingshakri ia kiwei pat. Ka jingdon ka jongphi ha nongbah Delhi kan dei kata ka shap bad ka muhor jong ka jaidbynriew hangne bad ynda phi leit phai phin long kum kita ki atiar ban noh synniang na ka bynta ka ri bad ka jaidbynriew”.
Katba u Bah Daniel Thangkhiew ula ong, ba ka jaidbynriew Hynniewtrep kadei ka jaidbynriew kaba long kyrpang bad da ka jingpynlong ia kane ka prokram ka wanrah ia ka jinglong kawei jong ka jaidbynriew kaba long kaei kaei kaba sngewtynnad.
Ula kyntu ia ki samla ba watla ki don shabar jong ka jylla hynrei kim dei pat ban klet noh ia la ka tynrai la jong kaba long kaba kyrpang bad ula iathuh ruh ba mynshwa ki samla ka jylla kiba sah shabar jongka jylla ki mad ia ka jingeh hynrei ki samla ka jylla kiba don ha kylleng ka jylla jong ka ri ki long kiba donbok namar ki ioh ia ki lad jingiarap haba ki mad ia kano kano ka jingeh bad ka sorkar jylla hapoh ka jingialam u Myntri Rangbah ka Jylla u Conrad K Sangma kala shimkhia haba ki samla ka jylla ki mad ia kino kino ki jingeh.
