Itanagar, Nohprah 05 :Kawei ka shnong rit kaba pajih hapoh Liromoba Constituency jong ka West Siang district ka Arunachal Pradesh kala sakhi ia ka jingwan pynieng ia u tower 4G hynnin ka 4 tarik lyngba ka prokram aijingiarap sha ki shnong ba pajih da ka sorkar pdeng.
Ha kane ka sngi na ka liang u Nyamar Karbak uba dei u MLA na Liromoba Constituency ula sam ruh ia ki simcard Airtel sha ki nongshong shnong nalor ka jingplie ia ki sawtylli ki projek kam pyntroi hapoh ka shnong Gemo Moku kaba hap hapoh Kamba Circle jong ka Liromoba.
Kine ki projek ki dei ki 4G Airtel Network Tower (kiba hap hapoh ka universal service obligation Fund), Community Hall-Dare, ki nala poh surok na ka BRTF Road sha Gemo Moku, nalor ka jingsam ei ia ki Airtel Sim Card.
Lah ban kdew ba kane ka shnong Gemo Moku kaba itynnad ka don tang kumba hynriew tylli ki longiing hynrei ka long kaba kongsan kumba long kiwei pat ki shnong, bad kane ka projek ka dei ka sienjam ka ban pynlong ia kine ki shnong kiba pajih ba kin hap lang ha kajuh ka thup kam pynroi kumba long kiwei pat.
Nalor kata na ka liang utei u MLA ula pynthikna ruh ba man ki shnong hapoh ka constituency ka jong u kin ioh ia kine ki juh ki projek kiba iadei bad ka jingpyniasoh lyngba ki mobile phone. “Kine kin iarap shuh shuh ban kyntiew ia ki kam pynroi ha ki por ki snem ki ban wan,” ong u MLA.
Ha kajuh ka por u Karbak ula kyntu ruh ia ki nongshong shnong ba kin long kiba adkar khamtam ha kaba iadei bad ki khynnah bad ki samla ha kaba iadei bad ka rukom pyndonkam ia ki phone lem bad kiwei pat ki tiar electronic.
“Ka dei ka jingkitkhlieh jong kiba la heh la san ban ai ka jingpynshai bad ban ialam ia ki khynnah ki jong ngi ba kin nang kumno ban pyndonkam ia kane ka kabu kaba kila ioh pdiang,” ong shuh shuh utei u MLA.
Shuh shuh u Karbak u tyrwa ruh ia ka jingkhublei na ka bynta u Myntri Rangbahduh (PM) Narendra Modi kumjuh ia u Myntri Rangbah ka jylla u Pema Khandu halor ka jingiarap ban pynurlong ia kane ka jingphohsniew.
