Shillong, Rymphang 02: Ka seng BJP hynne ka sngi palei kala pynbna paidbah iaka kyrteng jong ki 60 ngut ki kyrtong kiban iakhun iaka MLA Election 2023 ha ka jylla Meghalaya kaban long ha ka 27 tarik mynta u bnai.
Ha kane ka jingpynbna tiket , ka BJP kala pynkhamti iaka tiket ha u heh ophisar pulit barim ka jylla u Bah Mariahom Kharkrang na North Shillong katba u Bah Micheal Kharsyntiew ula duh noh iaka tiket ban iakhun na ka BJP.
Ka jingiaknieh tiket ha ka seng BJP na North shillong kala jur bha naduh u snem uba la dep.
La sakhi ba u kyrtong uba nyngkong duh uba la pan tiket BJP na North Shillong u dei u Bah Rocky Hek uba la mih noh na ka seng BJP bad leit iasoh sha ka seng NPP na Pynthorumkhrah Constituency.
Wat u kyrtong ka BJP uba rem salit ha ka Elekshon MLA 2018 u Bah JA Lyngdoh ruh uba la pan tiket biang na ka BJP khatduh khatwai ula mih noh na ka BJP ban iakhun noh na ka seng Congress na North Shillong.
Ka ktem jong ka BJP kala nang pait nang pra shuh shuh ha kaba wat u Bah Martamlin Pyrbot uba la pan tiket BJP, ula pynbna ban ym iakhun shuh iaka elekshon hynrei yn kyrshan noh ia u Bah Micheal Kharsyntiew uba pan tiket na ka BJP.
Hadien ba ki nongialam ka BJP kila pynbna ban ai iaka tiket ia u Bah Kharkrang, U Shlem ula pyrshang ban phone ia u Bah Micheal Kharsyntiew ban kylli la ula shim rai eiei ban iakhun beit iaka elekshon ne ban ym iakhun shuh, hynrei ym shim la ioh ban iakren ia u Bah Micheal.
