Nongpoh, Risaw 04: Sa u wei pat u rang ïakura ka jylla u ba la mihkhmat napoh ka shlem Ground and Pound MMA Gym Ri Bhoi Distric , u samla Daniel Damlong u la lah ban wanrah ïa ka nam ïa ka jylla Meghalaya da kaba ïohrah ïa u takma ksiar (Gold Medal) na ka lympung jong ka National MMA Championship 2022.
Ia kane ka lympung ialehkai la pynlong da ka All India Mixed Martial Arts Association ha ka 30 tarik u Nailur haduh 2 tarik u Risaw ha Hyderabad, Telangana.
Katkum ka jingïathuh u Bah Cores Marweiñ, uba dei u Coach ka Ground & Pound Gyms, la ong ba ha katei ka lympung ïa kura Mixed Martial Artsm la wan ban ïa shimbynta haduh 600 ngut ha ki kyrdan bapher bapher katba na Meghalaya la leit ban mihkhmat tang 5 ngut, ha kaba u Daniel Damlong u la ïoh ban khur ïa ka takma ksiar ha ka kyrdan Light Heavy Weight Division hadien ba u la lah ban pynliem noh ïa u Vikas Yadav napoh ka jylla Orissa.
U la pynpaw ruh, ba watla kiwei ki rangïakura kim shem la lah ban poi sha ka thong hynrei kine ki rang iakura ki dei kiba la liem ha ka jingiakhun jong ka quarter final bad semi final.
Ka Ground & Pound Gym ka la ai ïa ka jingkitbok kitrwiang ïa baroh ki rang iakura ba kin nang pynkhreh bha shuh shuh ban ïa khun ha kiwei pat ki lympung ïa kura ki ban nang wan hadien habud.
Kane ka Gym kala ai ruh ïa ka jingïaroh ïa u samla Daniel Damlong halor katei ka nam ba u la wanrah ïa ka jylla bad ruh ka jingkitbok ban nang kiew ha kane ka kam ïalehkai mixed martial arts.
