Nongpoh, Risaw 25 : Ki Pulit ka Umiam Police Station mynnin ka miet, kila ioh ban pyllait ia kawei ka samla lud (bala buhrieh kyrteng) kaba shah rahbor hala u jong u Hynmen Kynsi na kawei ka shnong jong ka Eastern West Khasi Hills.
Ki Pulit ka Umiam kila pynapshrip ha Lad Umsaw ia ka kali jong une u briew uba rahbor iala ka jong ka Para Kynsi arkmie hadien ka jingioh jingtip ruh ia ka jaka ba u don (location) lyngba ka google map kaba pyni ba u iaid na Mawmaram ban mih sha Umiam Ri-Bhoi.
Ki Pulit kila kem ia une u briew bad kurup ruh ia ka kali ba u pyndonkam ha kaba rahbor ia kane ka samla lud.
Kat kum ka khubor Pulit la iathuh, kane ka samla kala mih nala iing ban leit sha ka jaka pule kaba don ha Mairang bad kala shong da ka kali kamai ML05-U-2717 ba niah da une u Hynmen Kynsi uba kyrteng u Finance Chester Pariong. La ong ba une u briew ha ka jaka ban leit sha Mairang, ula kit bak ia kane ka samla da kaba ong ban leit sha Shillong hynrei ynda poi ha Mawmaram, ula khun sha ka lynti ban mih sha Lad Umsaw, Ri-Bhoi.
Kane ka Samla haba sngewpher ia kane ka jingleh une u briew, kala phah khubor sha ki katto katne ki paralok bad sha ki bahaiing lyngba ka mobile phone. La ong ba ki bahaiing mar kumta hi, kiba la leit ban pyntip mar mar ia kaei kaba jia sha ki Pulit ka Mairang Police Station kiba la pyntip pat sha ki Pulit ka Umiam Police Station ba kin apshrip bad ban kem ia une u briew.
Ki Pulit kila ioh ban pyllait ia kane ka samla lud na ka kti jong une u hynmen kynsi bad kila kem noh ia une u briew bad kurup ia ka kali. Ki Pulit kila ialam noh ia baroh arngut sha Thanad ban pynlong ia ka jingtohkit bad hadien la aiti noh sha ki Pulit ka Mairang Police Station ba kin pynlong ia ka jingtohkit kaba kham bniah bad ban leh ia kaba donkam baroh.
Ki Pulit ki iathuh ba kane ka samla lud kala phla ruh ba une u Hynmen Kynsi ula pyrshang ban ktah kti ne leh khlem akor ia ka ha ka surok khlaw na Mawmaram sha Lad Umsaw.
