Shillong, Jymmang 12 : Ka Khasi Students’ Union (KSU) Delhi Unit, kala ioh ban pyllait ia kawei ka samla Khasi, kaba shah set jubor hala u jong u samla ha ka jaka sah jong u ha Hasanpur, East Delhi.
Ia kane ka samla la ioh ban pyllait ha ka step 11 tarik Jymmang hadien ka jingioh pdiang ia ka jingkyrpad ban leit ai jingiarap ia kane ka samla kaba dang 22 snem ka rta.
Ka KSU-Delhi hapoh ka jingialam ka President samla Marbiang Khongwir bad Vice President Donbok Pohrmen, haba ioh ia kane ka jingtip, kila leit ban wad jingiarap na ki Pulit ka Nongbah Delhi bad lai tylli ki Police Station kila kyntait ban iarap na ka daw ka jingbym lah ban lap ia ka Iingsah jong une u shynrang.
Ka Seng kala wad ia ki lad ki lynti baroh bad khatduh kala ioh iaka jingiarap na ka Madhuvihar Police Station, kiba la pyn donkam ia ki kor technology ban lapdien ia ka iingsah une u briew.
Ki Nongialam ka KSU ki iathuh ba kane ka jingiawad ia kane ka samla kala sdang naduh ka por 11:30 mynmiet jong ka 10 tarik Jymmang bad dei tad haduh ka por 5 baje mynstep la lapdien ia ka bad ha ryngkat ki Pulit ka Madhuvidar, la pynlong ia ka jingkhynra ia ka iingsah une u briew bad la ioh ban pyllait noh ia kane ka samla.
Ki Pulit kila kem ruh ia une u briew bad kila rah ia u sha Madhuvihar Police Station ban pynlong ia ka jingtohkit.
Ki Pulit kila shim ia ka statement na katei ka samla Khasi bad la ialam ruh ban leh medical cehckup ia kaba la synran da ki dkhot ka Seng. Ki Pulit kila pyllait noh ia kane ka thei samla hadien ba kala kyrngap ban ujor ejahar pyrshah ia utei u samla ba set jubor ia ka.
Na ka liang ka KSU kala ai khublei ia ki Pulit ka Delhi bad ka SPUNER Special Police Unit for North East Region bad kumjuh ruh ia ka Madhuvihar Police Station, kiba la kloi ban ai ka jingiarap ban ioh pyllait ia kane ka samla.
