Guwahati, Risaw 20: Hynnin ka sngi Balang ki bor pulit kila ioh ban pyllait ia ki 13 tylli ki mrad kiba kham pher bad kiba la jan duhjait napoh Chachar district ka Assam hajan khappud ka Mizoram.
Na ka liang ki heh ka tnat forest kila ong ba ia kine ki mrad la thep hapoh ki ruh hadien ba la ioh ban kurup noh napoh kawei ka kper slasha hapoh Cachar district ka Assam.
U Divisional Forest Officer (DFO), (Cachar) u Tejas Mariswami ha ka jingkren ula ong; “Ia kine ki mrad la thmu ban khaii beain na shiliang khappud.” “Ngi la ioh ban kurup hynniew tylli ki kynja shrieh ba la tip kum ki Moor Macaques, santylli ki kynja shrieh Nosed Guenons, bad uwei u jait shrieh Debrazza,” ong shuh shuh DFO ka Cachar district.
Ia kine ki jait mrad kiba kham phet la iathuh ba la iohi nyngkong eh da ki nongshong shnong hapoh ka thain Derby tea garden bad kiba la pyntip noh kham hadien sha ki heh ka tnat forest.
Katkum u dkhot jong ka tnat forest hapoh Cachar la ong ba hadien ba ki briew kila pyntip halor ka jinglapdien ia ki katto katne ki shrieh kiba kham phylla na kane ka jaka, kumta ruh na ka liang ki dkhot ka tnat forest kila wan poi mardor ha kane ka jaka.
Kumta ruh na ka liang ki dkhot ka tnat forest kila ioh ban kurup haduh 13 tylli ki jait shrieh kiba kham pher ia kiba la set hapoh ki ruh na katei ka jaka.Ia kine ki mrad yn pynkynriah noh shapoh Assam State Zoo ha Guwahat, ong u heh ka tnat forest.
Ha kaba kum kane ka jingjia kaba la jia ha ka 15 tarik mynta u bnai, ki bor pulit ka Mizoram bad ki dkhot ka tnat Excise na Champhai bad na ka tnat Narcotics kila ioh ban pyllait haduh 140 tylli ki mrad ba phylla kynthup ia ki sim na ki laitylli ki kali (van).
Halor kane ka jingjia la kem noh ruh ia laingut ki briew bad la kurup noh ruh ia ki kali, ong ka khubor.Kiba bun na kine ki jait mrad ki dei kiba la khaii beain napoh Myanmar.
