Shillong, Nohprah 14: Ka Jylla Meghalaya kala wan Ba-ar ha kine ki ar snem ha ka Group D ha ka jingioh pdiang ia ka khusnam National Energy Conservation Award halor ka jingtrei shitom ban kyntiew iaka jingpynmih ia ka bording, ban tyngkai ia ka jingpyndonkam bording bad ban kyntiew ia ki kam ki ban pynneh pynsah.
Ia kane ka jingai khusnam la pynlong da ka Bureau of Energy Efficiency, Ministry of Power, ka Sorkar India, kaba ai jingithuh ia ka jylla Meghalaya ba ka la lah ban pynurlong ha kaban wanrah ia ka jingkylla ha kaba iadei bad ka mariang lyngba ki sienjam ban kynshew ia ka bording.
Ha kane ka jingialang la wan iashimbynta da Jagdeep Dhankhar, u Vice President ka India bad u Shripad Naik u Myntri Khynnah ka Sorkar Pdeng uba khmih ia ka tnad Bording kiba la sam ia kitei ki khusnam sha ki jylla kiba la ioh ia ka jingithuh halor ka jingnoh synniang ban pynduna ia ka jingpyndonkam ia ka bording.
U Vice President haba ai jingkren ula iaroh ia baroh ki jylla halor ka jingtrei borbah ka jongki ban noh synniang ban pynurlong ia ka thong jong ka ri ban pynneh pynsah ia ka bording bad ka jingkhem jingmut ka jongki ban ialeh ban iada bad ban pynneh pynsah.
U Myntri ka Tnad Bording ka jylla Meghalaya u Abu Taher Mondal ula ong, ba ka sorkar kala sdang ia ki katto katne ki lad ban pynduna ia ka jingpyndonkam ia ka bording, kaba kynthup ia ki jingpyrshang ban pynduna ia ka jingpyndonkam ia kabor ding ha ki kam shna tiar, ka jingbei tyngka ha ka renewable energy ne kaj inglah ban pynmih biang ia ka bording, ka jingpyndonkam ia ki kor ki bor ban pyndonkam duna ia ka bording bad ka jingpynbna paidbah ia ki polisi treikam kiba iadei bad ka jingpyndonkam ia ka bording bad katto katne ki dang don ha ki bynta ba khatduh ban ioh pynbna paidbah.
Ula ong ba kine ki jingthmu ki la iarap ban pynduna ia ka jingpyndonkam ia ka bording, kaba iadei bad ka thong jongka sorkar ha kaba iadei bad ka jingpynmih ia ka Carbon.
U Mondal ula ai khublei ia u Myntri Rangbah ka jylla u Conrad K Sangma halor ka jingai jingkyrshan kaba khlem shongthait ia ka tnad bording bad ka jingai jingithuh ia ki paidbah kiba la shim ia ki sienjam ban pyndonkam duna ia ka bording bad kumta ka jingioh ia ka khusnam kadei ka jingpeit bniah katkum ka jingpaw hapoh jongka State Energy Efficiency Index, ryngkat bad ki polisi treikam bad ki kam kiba la leh kiba iadei bad ka jingpyndonkam duna ha ki liang bapher bapher.
Ula pyntip ruh ba ka sorkar kala dep ban ‘Notify’ ia ka Meghalaya Energy Conservation Regulation 2017, kaba thmu ban kyntiew ia ka jingpyndonkam ia ki tiar ki tar kiba pyndonkam da ka bording kiba la ioh ia ka BEE Star bad la khang pyrshah ban pyndonkam ia ki ‘Bulb Light’ bad ia ki Choke ha ki Tube Light.
Ka sorkar kala thung ruh ia ka State-Level Steering Committee ban ithuh ia ki mat kiba kongsan ban wanrah ia ka jingkylla ha ka rukom pyndonkam ia ka bording bad ka sorkar kala pynmih ruh ïa ka Meghalaya Electric Vehicle Policy 2021, kaba thmu ba 15% na ki kali jong ka jylla kin pyndonkam da ki Battery elektrik hapoh u snem 2025.
