Jowai, Lber 04 : Ka samla Ridamaya Passah ba na Jowai, kala shah jied ban mihkhmat ia ka India sha ka Top Model of Universe pageant ka ban long ha Turkey mynta u snem.
Ka samla Ridamaya kala ioh ia ka nam kum ka Mega Miss India – Top Model of the Universe ha ka grand ceremony kaba long ha ITA Cultural Complex, Machkhowa, Guwahati myn ha ka 2 tarik Lber.
Ha ka 20th edition jong ka Sunsilk Serum Mega Miss Northeast 2024 pageant, ka Dipti Basumatary na Assam, ka Minica Konjengbam na Manipur bad ka samla Ridamaya Passah na Meghalaya kila ioh khur ia ka jingjop. Ym shym la don ki runners-up title ha ka Sunsilk Serum Mega Miss Northeast 2024 bad kine baroh lai ngut kila shah jied lang kum ki nongjop ha kane ka jingiakop thei bhabriew bad ioh lang ia kajuh ka song khusnam bad ki jingmyntoi.
Ka samla Ridamaya ka dei kaba na Jowai bad ka dang pule BA final year ha Women’s College Shillong. Ka samla Ridamaya kala ioh ruh ia ka nam kum ka nongjop ha ka The Loft Winter Queen pageant kaba long ha U Soso Tham Auditorium, Shillong.
Ka Mega Entertainment kala pynkhreh ban ai ia ki jinghikai pyntbit ia baroh laingut ki nongjop, ban pynthikna ba kin tyng shain bha ha ki rynsan jong ka pyrthei.
