Aizawl, Risaw 19 : Ki bor shipai na ka 23 Sector jong ka Assam Rifles hapoh ka jingialam jong u Inspector General Assam Rifles (East) nalor ki dkhot ka tnat Excise bad ka tnat narcotics kila ioh ban kurup ia u drok Methamphetamine tablet uba shongdor haduh kumba T. 30.84 klur ha ki jaka iew beain ka pyrthei.
Ka tnat shipai Assam Rifles kala ong ba kila ioh ban kurup haduh 92,550 tylli ki tablet bad ka dor jong kine ki drok ha ki jaka iew ka pyrthei ka long haduh T.30,84,99,691 klur.
Kane ka tnat kala ong ruh ba kala ioh ban kurup noh ia kine ki drok na ki bynta jong ka jaka iew ha Falkland Veng kaba hapoh Aizawl district.
Ha kane ka jingleit khynra la iashim bynta lang da ki bor shipai ka Assam Rifles bad na ka tnat Excise bad Narcotics Department kiba treikam na Aizawl, kata hadien ba kila ioh ia ka jingtip kaba bniah.
Hadien ba la ioh ia ka jingtip kaba bniah katei ka kynhun kala ioh ban bat noh ia kawei ka kali hapoh ka jaka ap pahara ha ka sngi Nyngkong ba la lah.Kane ka kynhun kala sakhi ia kawei ka kali kaba kila suba jur ha ka por kumba 8 baje mynmiet.
Ha ka por ba kila pynlong ka jingtalasi ka kynhun kala bat ruh ia u nongniah jong ka kali kaba kit ia shibun bah kine ki drok Methamphetamine tablets.Hadien la kurup noh ia kine ki drok bad la kem noh ia une u briew.
