Aizawl, Naiwieng 26: Ha kawei pat ka khana jingjop kaba iadei bad ka thma pyrshah drok, ki pulit ka Mizoram kila ioh ban kem noh ia laingut ki briew kiba donkti ha ki kam khaii drok hapoh Selesih hajan Aizawl.
Hadien ba la ioh ia ka jingtip kaba bniah, ki shipai ka Assam Rifles ha ryngkat ka jingiatreilang ki dkhot na ka tnat Excise bad Narcotics department napoh Aizawl kila pynlong ka jingkhynra ha ki bynta jong ka Selesih hajan ka sorbah Aizawl.
Ha kane ka jingkhynra katei ka kynhun kala ioh ban kurup ia ki 50 tylli ki jingsop sabon ha kaba la thep ia kumba 653 gm u drok heroin uba shongdor haduh kumba T. 3,26,50,000.
Nalor une u drok, ka kynhun kala kurup noh ruh ia ki artylli ki kali, kawei ka thuk thuk Yamaha R 14 kaba don ia u nombor MZ 01T 6196 bad kwei pat ka kali Hyundai Getz kaba don ia u registration nombor MZ 01 E 4367 ba la pyndonkam da kitei ki laingut ki nongkhaii drok.
Ia kine ki laingut ki briew kiba la shah kem kumjuh ia ki tiar ba la ioh kurup la aiti noh sha ki bor ba dei khmih jong ka tnat Excise bad ka tnat Narcotics hapoh Aizawl na ka bynta ban bteng shuh shuh ia ka jingtohkit.
Lah ban kdew ruh hangne ba ki bor pulit ka Aizawl kiba don hapoh Zonuam outpost kila ioh ia ka jingtip kaba bniah ha kaba iadei bad ka jingdon jong kawei ka byrni kaba suba buhrieh drok ha kawei ka lynti surok hajan ka lynti surok hapoh MZU (Mizoram University).
Kumta ruh hadien kane ka kynhun ki pulit lem bad arngut ki sakhi na ki riew paidbah kila her bran bran sha katei ka jaka ban pynlong ka jingkhynra ha ka miet jong ka 21 tarik mynta u bnai ha kaba kila ioh ban kurup ia ka byrni kaba heh kaba don haduh 22 tylli ki jingsong ba la buhrieh ha ka jaka ba long khlaw.
Hadien ba la plie ia kine ki song la lapdien ia kumba 215 tylli ki jingsong sabon kiba la thep da u drok heroin uba khia kumba 2.76 kilo.La ong ruh ba une u drok ba la lapdien u shongdor haduh kumba T.13.8 klur ha ki jaka iew beain ka pyrthei.
